Б.ОД

Халдварт өвчин судлалын үндэсний төвөөс ханиад томуугийн тархалттай холбоотой дараах зөвлөмж мэдээллийг өгч байна.

Энэ оны нэгдүгээр сарын 20-ны байдлаар ХӨСҮТ 200 нэмэлт ор дэлгээд байна. Сүүлийн 21 хоногийн байдлаар томуугийн дэгдэлт өссөн хандлагатай байгаа. Насны бүлгээр нь авч үзвэл амбулаториор үйлчлүүлэгчдийн 70 орчим хувийг 15 хүртэлх насны хүүхдүүд эзэлж байна. Үүний 60 орчим хувийг дөрөв хүртэлх насны хүүхэд байгаа юм. Тиймээс хүн бүр амны хаалт тогтмол зүүхийг зөвлөлөө.

Улсын хэмжээнд одоогоор томуугийн H3N2, А хүрээний H1N1, болон B хүрээний гурван вирус идэвхтэй байна. Үүнээс гадна томуу төст өвчний 4-5 вирус орчилд байна. Түүнчлэн өнгөрсөн долоо хоногоос эхлэн томуугийн хүрээний вирусын идэвхжил нэмэгдэх хандлагатай болж байгаа учир хүн бүр урьдчилан сэргийлэх нь зүйтэй.Нэг вирусээр халдварласан хүн дахин өөр вирусээр халдварлаж ханиад, томуугаар өвдөх магадлалтай.

Ханиад, томуугаар өвдсөн хүүхэд болон том хүний дархлааны систем муудчихсан байдаг тул дараачийн вирусээр халдварлах магадлал өндөр болдог. Тиймээс давтамжтай ханиад хүрэх тохиолдол бага насныханд буурахгүй байна.Бүх насныхан COVID-19 болон ханиадны вирусээр давхар халдварлах  эрсдэлтэй гэдгийг анхаарууллаа.

Эх сурвалж:www.polit.mn