Т.САЙХАН

Хөгжлийн Банкнаас “Изинис Эйрвэйз” ХХК-д агаарын тээврийн үйл ажиллагааг өргөжүүлэх, үнэ тарифыг бууруулахад зориулж 22.9 тэрбум төгрөгийг олгожээ. Үүнээс 7.5 тэрбум төгрөгийг бусад банк дахь зээлийг төлж хаахад зарцуулсан буюу зориулалтын бусаар зарцуулсан. Мөн 1.7 тэрбум төгрөгийн зарцуулалт тодорхойгүй гэх шинжээчийн дүгнэлт гарсан байна. Гэрчээр дуудагдсан "Изинис Эйрвэйз” ХХК-ийн 30 хувийн хувьцаа эзэмшигч Э.Золзаяа байр сууриа илэрхийллээ.  

Тэрбээр “Шинжээчийн дүгнэлттэй танилцлаа.  Зориулалтын бусаар зарцуулсан гэх дүгнэлттэй санал нийлэхгүй байна. Зориулалтын бус гэсэнд тодорхой тайлбар өгөх дүнгүүд байна. Тухайлбал, Богд банк руу гаргасан 4.2 тэрбум, Чингис хаан банк руу гаргасан 2.1 тэрбумын дүн байна.

Анхнаасаа Хөгжлийн банкнаас бид зээл авахад зээлийн зарцуулалт нь өөрөө манай  эргэлтийн хөрөнгийг санхүүжүүлэх буюу онгоц, сэлбэг санхүүжүүлэх гэх мэт олон төрлийн зарцуулалтын зориулалтай зээл байгаа. Бид бүх зарцуулалтаа тухай бүрт нь банканд хандахад Хөгжлийн Банк өөрөө тэр гүйлгээг хийдэг байсан.

Богд банк руу гарсан зээл ямар холбогдолтой вэ гэвэл Хөгжлийн Банкнаас зээл авахаар хандсан байх үедээ “Изинис Эйрвэйз” ХХК Богд банканд зээлтэй байгаа ба зээлийг хаалгах хүсэлтэй байгаагаа мэдэгдсэн байсан. Үүнийг Хөгжлийн банк зөвшөөрсөн. Энэ гүйлгээг Хөгжлийн банк өөрөө хийсэн. Тэгээд Богд банканд байсан манай барьцаа хөрөнгийг шилжүүлж авсан байдаг. Харин Чингис Хаан банк дахь "Сарнайх" ХХК-аар дамжуулж авсан зээл нь дараах утгатай. Чингис Хаан банк нь "Изинис Эйрвейз" ХХК-д зээл өгөх боломжгүй гэсэн. Тэгээд Сарнайх ХХК-аар дамжуулж, 2.1 тэрбум төгрөгийн зээл авч, “Изинис Эйрвэйз” ХХК-д ашигласан. Үүнийгээ нотолсон. Яг ийм процесс явсан.  Тэгэхээр зориулалтын бусаар зарцуулсан гэдгийг хүлээн зөвшөөрөхгүй. Яагаад гэвэл тухайн үед бүх юмаа зөвшөөрлийн дагуу хийж байсан бөгөөд  гүйлгээг нь Хөгжлийн банкнаас гаргасан" гэлээ. 

Эх сурвалж:www.polit.mn