Б.ОД

УИХ дахь Хөгжлийн банкны хянан шалгах түр хорооноос зохион байгуулж буй Нотлох баримтыг шинжлэн судлах сонсгол үргэлжилж байна. Өнөөдрийн сонсголд 15 компанийн зээлтэй холбогдуулан 57 гэрчийг дуудсан юм.

Энэ үеэр "Эгийн голын УЦС" төсөлттэй холбогдуулан шинжээчийн дүгнэлтийг танилцууллаа.Эгийн гол, Сэлэнгэ мөрөн нь Байгаль нуурын биологийн олон янз байдалд үзүүлэх нөлөөтэй холбоотой Юнескогийн Дэлхийн өвийн хорооны 39-41 дүгээр чуулганы шийдвэрээр төсөл зогсох болсон байна. 

2018 оны жилийн эцсийн байдлаар “Эгийн голын УЦС" төсөлд 10.6 сая ам.доллар буюу 21.4 тэрбум төгрөгийг зарцуулжээ. Тухайн зардлын 24 хувь болох 5.1 тэрбум төгрөгийг тээврийн хэрэгсэл, тавилга эд хогшил, бэлэг дурсгал болон бусад зүйлд зарцуулсан гэдгийг шинжээч хэлж байв. 

Энэ үеэр Хөгжлийн Банкны Төслийн санхүүжилтийн газрын дарга Б.Сайнзаяа “Өнөөдрийн байдлаар тус төслийн үлдэгдэл 56.8 тэрбум төгрөг буюу 10.6 сая ам.доллар байгааг залруулах хэрэгтэй. Тухайн үед ирээдүйн борлуулалтын орлогыг үнэлээд түүгээрээ зээл төлнө гэсэн төсөөлөлтэй зээл олгосон юм билээ. Хэрвээ зээлийн үйл ажиллагаа доголдох юм бол улсын төсвийн хөрөнгөөс санхүүжүүлнэ гэсэн заалттай. Засгийн газрын 2013 оны арваннэгдүгээр сарын 16-ны өдрийн 375 дугаар тогтоолд "Эгийн голын УЦС", "Тавантолгойн цахилгаан станц"-ын ТЭЗҮ боловсруулахад зориулан 50 сая ам.доллар олгохыг тусгасан. Энэ тогтоолын дагуу "Эгийн голын УЦС" руу санхүүжилтээ шилжүүлсэн. Тэгэхээр зөвхөн ТЭЗҮ-д зориулагдсан бөгөөд төслийг бүхэлд нь санхүүжүүлээгүй. Энэхүү зээл 2017 онд улсын төсөв рүү шилжих ёстой байсан ч Хөгжлийн Банк дээр үлдсэн” гэв.

 Эх сурвалж:www.polit.mn