Б.ЖАВХЛАН

Боловсрол, шинжлэх ухааны яам, НҮБ-ын Хүүхдийн Сан хамтран Люксембург сангийн дэмжлэгээр “Цахим аялал” төслийг хоёр дахь жилдээ хэрэгжүүлж байгаа бөгөөд энэ удаа нүүдэлчин соёлыг сурталчлах “Nomadic Adventure” гар утасны тоглоомыг бүтээжээ.

Төслийг “Марчаахай” ХХК болон гар утасны тоглоом бүтээгч “Номадик Бэйр Гэймс” ХХК-тай хамтран хэрэгжүүлсэн байна. Энэ төслийн хүрээнд сургуулийн өмнөх болон бага боловсролын сурагчдын сурлага, хөгжлийг дэмжих 150-160 төрлийн тоглоомыг багтаасан 60 шинэ интерактив контент боловсруулахаас гадна боловсролын салбарт хийгдсэн бүрэн хэмжээний гар утасны анхны тоглоом болохоороо онцлог аж. Үүнээс гадна тоглоомын арга зүйг ашиглан Монгол ёс заншил, ахуй амьдрал, уламжлалт баяр, язгуур урлаг, газар зүйн онцлог, ан амьтдын талаарх суурь мэдлэгийг хүүхэд багачуудад түгээх ялангуяа хилийн чанадад байгаа Монгол хүүхдүүдэд өв соёлоо мэдэж, хадгалж яваасай гэсэн зорилготой бүтээсэн байна. Playstore болон Appstore- с нээлттэй татан авах боломжтой бөгөөд хичээлүүдийг medle.mn сайтаас үнэ төлбөргүй үзэх боломжтой юм. Өнөөдрийн байдлаар зөвхөн Андройд гар утсан дээр 5000 гаруй удаа татан авалт хийгджээ.

Эх сурвалж: www.polit.mn