Б.ДОЛЖИНЖАВ

Нохойд хазуулсан есөн иргэнд галзуугийн биш сүрьеэгийн вакцин андуурч тарьсан хэрэг Сүхбаатар аймагт гарсан. ЭМЯ, ХӨСҮТ, ЗӨСҮТ, МХЕГ гэсэн хамтарсан Ажлын хэсэг өнгөрсөн өдрүүдэд Сүхбаатар аймагт ажиллажээ. Ийн долоон иргэнийг Улаанбаатарт авчран ХӨСҮТ-д эмчилж байгаа юм.

Энэ талаар ХӨСҮТ-ийн Эмнэлгийн тусламж үйлчилгээ эрхэлсэн дэд захирал Ц.Чинбаяр “Тарилга андуурч хийлгэсэн Сүхбаатар аймгийн долоон иргэнийг бид өчигдөр ХӨСҮТ-д авчирсан.Одоогоор тэдэнд ямар нэгэн өвчлөл байхгүй.Эдгээр долоон иргэний гурав нь хууч архаг суурь өвчтэй байсан. Өвчин нь сэдрээгүй, өмнөх байдалдаа хэвийн байна.Долоон иргэний тарилга хийлгэсэн хэсэг газарт улайсан, үрэвслийн шинжтэй, хоёр иргэний тарилга хийлгэсэн газраас шүүс гарсан байна.Бидний хийсэн үзлэгээр биеийн байдал хүнд хүн байхгүй.Галзуу өвчний вакциныг хийгээгүй учир эрсдлийг үнэлэхэд галзуугаар өвчлөх эрсдэлгүй гэсэн дүн гарсан.Тиймээс галзуугийн вакцин хийх шаардлагагүй. Мөн сүрьеэгийн вакциныг андуурч хийсэнтэй холбоотой сүрьеэгийн эрсдэл маш бага гэсэн дүн гарсан.Гэсэн ч бид гарч болох эрсдлийг тооцоолоод ХӨСҮТ-д авчран цаашдын эрүүл мэндийн байдлыг нь хянаж байна” гэв.

Эх сурвалж:www.polit.mn