Б.ДОЛЖИНЖАВ

Томуу, томуу төст өвчний нөхцөл байдлын талаар ХӨСҮТ-ийн Тандалт сэргийлэлт эрхэлсэн дэд захирал Ж.Байгальмаа өнөөдөр мэдээлэл өглөө. Сүүлийн гурван долоо хоногт томуугийн халдварын тоо нэмэгджээ.

Тухайлбал, ХӨСҮТ-д 211 хүүхэд томуу, томуу төст өвчний улмаас хэвтэн эмчлүүлж байна. Үүний долоон хувь нь хүнд, 60 хувь нь хүндэвтэр байна. Эмнэл зүй шинж тэмдгийн хувьд бүх хүүхдэд халуурсан, ханиалгасан шинж илэрсэн байна. Мөн нус гоожих, амьсгаадах шинж тэмдэг  илэрчээ.

Энэ талаар ХӨСҮТ-ийн Тандалт сэргийлэлт эрхэлсэн дэд захирал Ж.Байгальмаа “Томуу, томуу төст өвчний халдвар сүүлийн гурван долоо хоногт тогтмол нэмэгдэж байна. Энэ сарын 9-ний байдлаар амбулаториор үйлчлүүлэгчдийн 13 хувь нь томуу, томуу төст өвчний халдвартай байна. Энэ нь өнгөрсөн долоо хоногоос гурван хувиар нэмэгдсэн үзүүлэлт юм. Улсын хэмжээнд томуу, томуу төст өвчний алаг цоог дэгдэлтийн буюу улбар шар түвшинд байна. Томуугийн B хүрээний вирус их дэгдэлттэй давамгайлж байгаа буюу томуугийн дэгдэлтийн голлох шалтгаан болж байна.Эмнэлэгт хэвтэн эмчлүүлэгсдийн 30 хувь нь амьсгалын замын цочмог хүнд халдвартай байна. Энэ нь өнгөрсөн долоо хоногоос зургаан хувиар нэмэгдсэн үзүүлэлт юм.Яаралтай тусламжийн тасгаар үйлчлүүлж байгаа хүүхдүүдийн 72 хувь, хэвтэн эмчлүүлж байгаа хүүхдүүдийн 85 хувь, сэхээн амьдруулах, эрчимт эмчилгээний тасагт эмчлүүлж байгаа хүүхдүүдийн 76 хувь нь амьсгалын замын цочмог хүнд халдвартай байна.Эмнэлэгт хэвтэлт нэмэгдсэнтэй холбоотойгоор сүүлийн байдлаар улсын хэмжээнд 619 орыг нэмэлтээр дэлгэсэн. Үүний 407 нь Улаанбаатар хотод, 212 нь орон нутагт байна” гэв.

Томуугийн дархлаажуулалт өнгөрсөн оны аравдугаар сард эхэлсэн. Улсын хэмжээнд хамрагдалт 82 хувьтай үргэлжилж байна. Улаанбаатарт 78 хувьтай, орон нутагт 87 хувьтай байна. Үүнийг задалвал хүүхдийн вакцинжуулалт 99 хувь, жирэмсэн эмэгтэйчүүд 19 хувьтай байна.

Эх сурвалж:www.polit.mn