Т.САЙХАН

БОАЖ-ын дэд сайд М.Ганбаатар Хэрэглэгчийн хяналтын төвд ажиллалаа.  Энэ үеэр тэрбээр “Уг төв нь нийслэл дэх гэр хорооллын 198000 өрхийн яндангаас гарч байгаа утааг хянах зориулалттай. Эхний ээлжид 120000 өрхийн яндангаас гарч байгаа утааг хянаж байна.

Бид хоёр аргаар агаарын бохирдлыг бууруулах боломжтой гэж үзсэн.

1. Айл өрхүүдийн янданг хөөлөх нь чухал. Учир нь битүүрсэн яндангаас гарч байгаа утаа 25-35 минут уугьдаг болохыг тогтоосон. Одоогийн байдлаар 62000 өрхийн яндан битүү байгааг хяналтын салбараас харж болно. Үүнийг ойрын хугацаанд хөөлөх ажлыг зохион байгуулна.
2. Мэргэжлийн хяналтын ажилтнууд өдөр бүр үйлдвэрт ажиллаж, орц норм, чийгшил, технологи зэргийг хянаж тэмдэглэх шаардлагатай байна. Ингэснээр шуурхай арга хэмжээ авах боломжтой.

Сайжруулсан шахмал түлш нь утааг арилгах богино хугацааны шийдэл байсан. Дунд хугацааны шийдэл болох дэлхийн жишигт нийцсэн хийгээр халах системийг нэвтрүүлэх ажлыг эхлүүлнэ. Энэ хүрээнд хийн түлш нийлүүлдэг үндэсний компаниудтай хамтран ажиллах болно.

Мөн нийслэлийн гэр хорооллын өрхүүдийг орон сууцжуулах ажлыг эрчимжүүлснээр утаанаас салах боломжтой.  

Орчны бохирдлыг бууруулах үндэсний хорооны төсвөөс тодорхой хувийг хотын төвийг яндангүй бүс болгоход чиглүүлнэ" гэв. 

Эх сурвалж:www.polit.mn