Б.Дамдин-Очир
Эрүүгийн цагдаагийн албанаас 2023 оны нэгдүгээр сарын 5-6-нд шилжих шөнө УБТЗ-ын Тээвэр зохион байгуулалтын албаны орлогч дарга С.Батдөлийг баривчилсан. Энэ талаар 6-ны өдөр ХЗДХ-ийн сайд Х.Нямбаатар “...Өнгөрсөн шөнө Эрүүгийн цагдаагийн албанаас хойшлуулшгүй ажиллагаа явуулж, УБТЗ-ын албан тушаалтан Б гэх хүний гэрээс болон түүний хамаарал бүхий этгээдүүдийн гэрээс нийтдээ 7.3 тэрбум төгрөгийн хураан авсан. Иргэн Б-г 48 цагийн хугацаатай баривчилсан.
Мөн дөрвөн тэрбум төгрөгийн үл хөдлөх хөрөнгийг үндэслэлгүйгээр олж авсан гэх хэргээр мөрдөн шалгаж байна” гэж мэдээлсэн. Зарим эх сурвалжийн мэдээллээр С.Батдөл нь "...Төмөр замынхныг шалгана" гэсний дараа уг мөнгийг хамаарал бүхий этгээдүүдийнхээ гэр рүү тээвэрлэж яваад цагдаагийнханд баригджээ. Тэгвэл тус албанаас С.Батдөлийг 48 цаг түр саатуулсны дараа үргэлжлүүлэн хорих саналыг НПГ-т хүргүүлсэн байна. Энэ дагуу НПГ-ын хяналтын прокурор М.Энхбаатар "...Үргэлжлүүлэн хорих" саналыг Баянгол дүүргийн Эрүүгийн хэргийн анхан шатны шүүхэд тавьжээ.
Гэтэл уг асуудлыг шийдэхээр томилогдсон шүүгч Г.Золбоо нь "...С.Батдөл нь өмгөөлөгчтэй хуралд орно гээд байна" гээд хурлаа хийлгүй хүлээжээ. Ингэсээр ажлын цаг ч дуусч, шүүгч Г.Золбоо "...Ажлын цаг дууссан. Хурал хийхгүй. Даваа гаригийн 10:00 цагт хийнэ" гээд "алх тогшсон" байна. Улмаар С.Батдөлийг суллажээ. Шүүгчийн товлосон "...Даваа гариг" гэдэг нь маргааш буюу 9-ний өдөр гэсэн үг. Ер нь бол С.Батдөлөөс өөр хэн ч ийм нөхцөлд цагдан хоригддог. Манай хууль хийгээд практик ийм юм. Харин С.Батдөлийг хорьсонгүй. Тэгэхээр түүнийг байх шалтгаан үндэслэл шүүгч Г.Золбоод байв уу гэх хардлага үүсч байгаа юм. Өөрөөр хэлбэл, энэ шүүгч өөрийн "итгэл үнэмшил"-ээр ингэж шийдэв үү, эсвэл "дээр"-ээс ирсэн тушаал биелүүлэв үү. Ямартай ч нийгмээрээ авлигын эсрэг боссон энэ цаг үед шүүх өөрөө авлигыг өөгшүүлсэн ноцтой үйлдэл гаргалаа.
Эх сурвалж: polit.mn