З.Батцэцэг

Францын засгийн газар эмийн нийлүүлэлттэй холбоотой асуудлаас үүдэн парацетамолыг 1-р сарын эцэс хүртэл онлайнаар худалдаалахыг хориглосон нь Бүгд Найрамдах Улсын Засгийн газрын сонины (Journal officiel) мэдээлэв.

"Зөвхөн парацетамол агуулсан эмийн онлайн худалдааг 2023 оны нэгдүгээр сарын 31-нийг хүртэл түр зогсоолоо" гэж Засгийн газрын тогтоолд дурджээ.

Францад парацетамол дээр суурилсан эм нийлүүлэхтэй холбоотой хурцадмал байдал зургаан сар гаруй үргэлжилж байгаа бөгөөд энэ нь хүүхдэд зориулсан эмэнд ч хамаатай гэж тэмдэглэжээ.

Өмнө нь Financial Times ДЭМБ-аас иш татан АНУ, Европын зарим эм зүйчид томуу, амьсгалын замын синцитиал вирус, коронавирусын өвлийн давалгааны улмаас эрэлт ихэссэнтэй холбоотойгоор парацетамол зэрэг нийтлэг өвдөлт намдаах эм дутагдаж байгаа тухай мэдээлж байсан. Үүнээс гадна дэлхий дээр антибиотик, ялангуяа пенициллин, амоксициллин дутагдалтай байна.

Коронавирусын тахлын үед антибиотикийн эрэлт буурч, нийлүүлэлтийн сүлжээнд ноцтой ачаалал үүссэн нь эм үйлдвэрлэгчдийг үйлдвэрлэлээ багасгахад хүргэсэн гэж эрүүл мэндийн мэргэжилтнүүд хэлэв. Нийлүүлэлтийн сүлжээ тасалдсан нь ялангуяа антибиотик үйлдвэрлэх бүрэлдэхүүн хэсгүүдийг нийлүүлэхэд хүндрэл учруулж байгааг хэвлэлд тэмдэглэжээ. Мөн эрчим хүчний үнийн өсөлт нь эргээд антибиотик үйлдвэрлэдэг компаниудын ашиг орлого буурахад хүргэдэг.