Б.ДАРЬСҮРЭН

Японы автомашин үйлдвэрлэгч хамгийн том компани болох Toyota нь SUV буюу бидний нэрлэдгээр "Harrier" загварын өмнө хийгдсэн гэрээгээ цуцлахаас гадна шинэ захиалга авахыг зогсоосон гэж Японы Jiji News агентлаг өчигдөр /2022.07.26/ мэдээллээ.

Тус мэдээнд дурдсанаар хагас дамжуулагчийн хомсдол болон цар тахлын тархалтын улмаас Хятадын Шанхай хотод тавьсан хөл хорионоос болж одоогийн Harrier загварын үйлдвэрлэл саатах, гэрээт борлуулагчдад хүргэгдэх хугацаа хожимдох асуудлууд үүссээр байгаа тул компанийн удирдлагын зүгээс ийм шийдвэр гаргахад хүрчээ. Компанийн зүгээс урьдчилан захиалга өгсөн үйлчлүүлэгчдээсээ захиалгыг нь цуцлахаас аргагүй нөхцөл байдлыг тайлбарлан хүлцэл өчжээ. Улмаар есдүгээр сард худалдаанд гарахаар төлөвлөж буй Harrier-ийн шинэчлэн сайжруулсан хувилбарыг санал болгож байгаа аж.

Мөн SUV ангиллын Land Cruiser болон тансаг зэрэглэлийн Lexus-ын зарим загварын нийлүүлэлтийн хугацаа хойшлогдсон тул захиалгыг түр хугацаагаар зогсоожээ. Түүнчлэн энэ оны үйлдвэрлэлийн төлөвлөгөөгөө бууруулсаар байгаа аж. Тодруулбал, өнгөрсөн IV-VIII сар хүртэлх төлөвлөгөөгөө бууруулснаар оны эхэнд төлөвлөж байсан 850000 нэгжийн үйлдвэрлэлээ 700000 болгон бууруулна гэдгээ энэ сарын 19-нд мэдэгдэв.