З.БАТЦЭЦЭГ

Энэтхэг улс Шри Ланкад ардчилал, тус улсын тогтвортой байдал, Шри Ланкийн эдийн засгийг сэргээхийг бүрэн дэмжиж байна гэв. Энэ тухай Энэтхэгийн Гадаад хэргийн яамны албан ёсны төлөөлөгч Ариндам Багчи мэдэгдэв. Шри Ланктай хөрш зэргэлдээх орны хувьд Энэтхэг улс энэ улсад өрнөж буй ардчилсан үйл явц, Шри Ланкийн эдийн засгийн тогтвортой байдал, сэргэлтийг бүрэн дэмжиж байна гэж А.Багчи Times of India сонинд хэлсэн байна. Тэрбээр "Бидний сайн хөршийн бодлогын дагуу Энэтхэг улс зөвхөн энэ онд Шри Ланкийн ард түмэнд хүндрэл бэрхшээлийг даван туулахын тулд 3.5 тэрбум ам.долларын тусламж үзүүллээ" гэв.

Шри Ланкийн Засгийн газрын зарим экс сайд нар болон тэдний гэр бүлийнхэн Энэтхэг рүү зугтсан тухай хэд хэдэн хэвлэл мэдээллийн хэрэгслээр цацагдсан мэдээллийг Шри Ланк дахь Энэтхэгийн Дээд комисс (ЭСЯ) үгүйсгэв. Дипломат төлөөлөгчийн газар твиттер хуудастаа нийтэлсэн мэдэгдэлдээ "Комисс үнэнд нийцэхгүй энэ худал мэдээллийг бүрэн няцааж байна" гэжээ. Дөрөвдүгээр сарын эхнээс Шри Ланкад хүнд эдийн засгийн хямралын улмаас амьдралын нөхцөл байдал муудаж байгааг эсэргүүцсэн олон нийтийн эсэргүүцлийн жагсаал үргэлжилж байна. Тавдугаар сарын 9-нд сөрөг хүчнийхний шахалтаар арлын ерөнхий сайд Махинда Ражапакса огцрохоо мэдэгдсэн ч жагсаал цуглаан үргэлжилсээр байгаа юм. Цуглаанд оролцогчид ерөнхий сайдын ордон, зарим сайд, депутатуудын байрыг шатаасан байна. Засгийн газрыг дэмжигчид болон эсэргүүцэгчдийн хооронд болсон мөргөлдөөний үеэр цагдаагийн сүүлийн үеийн мэдээллээр найман хүн амиа алдаж, 230 хүн шархадсан байна.

Эх сурвалж: www.polit.mn