З.БАТЦЭЦЭГ

Грекийн төмөр замын “TrainOSE” компанийн ажилчид Александруполис боомтод АНУ, НАТО-гийн цэргийн хуягт машинтай галт тэргэнд үйлчлэхээс татгалзсан тухай Грекийн Коммунист намаас (ГKН)  мэдээлэв.

Liberty King хөлөг онгоц ачаагаа буулгах гээд хүлээж байна. Гэсэн хэдий ч порталын мэдээлснээр төмөр замын ажилчид НАТО-гийн танкуудыг гаргаж авах галт тэргэнд мөн техникийн тээвэрлэлт хийхээс татгалзаж байна. 4 дүгээр сарын 2-нд Александруполис руу илгээгдсэн цахилгаанчин даргадаа татгалзсан хариу өгч, төмөр замын ажилчдыг Украины ойролцоох бүс нутгууд руу зэвсэг тээвэрлэхэд ашиглах боломжгүй, тэднийг хамсаатнууд болгож байна гэж дурджээ.

Орон нутгийн арав гаруй үйлдвэрчний эвлэл ажилчдыг өмгөөлж, Грекийн төмөр замыг цэргийн техник тээвэрлэхэд ашиглахаа зогсоож, цэргийн техник тээвэрлэхийг эсэргүүцэж буй ажилчдад дарамт учруулахгүй байхыг шаардсан тогтоол гаргасан гэж портал мэдээлэв.

“Ялангуяа манай улсын төмөр замын хөдлөх бүрэлдэхүүнийг АНУ-НАТО-ын зэвсэглэлийг хөрш орнууд руу шилжүүлэхэд ашиглахгүй байхыг шаардаж байна. Эдгээр өдрүүдэд Александруполис боомтоос НАТО-гийн танкуудыг тээвэрлэж буй тээврийн хэрэгслийн засвар үйлчилгээнд оролцохоос татгалзсан TrainOSE-ийн ажилчдын эсрэг ажил олгогчдын заналхийллийг бид буруушааж байна. Ажил олгогч нь "Галт тэрэг юу тээвэрлэх нь танд хамаагүй, энэ бол таны ажил, чи явах ёстой" гэж хэлсэн нь доромжлол юм” гэж вэбсайт дээрх тогтоолыг иш татжээ.

Портал мөн Грекийн Коммунист залуучуудын гишүүд хуягт машинтай галт тэрэг рүү улаан будаг цацаж байгаа бичлэгийг нийтэлжээ. Өмнө нь Грекийн засгийн газар Францын зургаан Dassault Rafale сөнөөгч онгоц авах гэрээнд гарын үсэг зурсан бөгөөд энэ нь Грекийн Агаарын цэргийн хүчний Рафале онгоцны флотыг 24 нэгж болгон өргөтгөх юм.

Эх сурвалж: www.gazeta.ru