Б.ДОЛЖИНЖАВ
Шоронд хоригдож байгаа Оросын Сөрөг хүчний удирдагч Алексей Навальныйн шүүх хурал Москва хотоос зүүн зүгт байрлах чанга дэглэмтэй хорих ангид өчигдөр эхэллээ. Авлигын хэргээр жил гаруй шоронд хоригдож байгаа түүнийг залилангийн хэрэгт дахин буруутган шүүж байгаа нь энэ юм. Тодруулбал, улс төрийн байгууллагуудад өгсөн хандивын 4.7 сая ам долларыг хувьдаа завшсан хэрэгт буруутгажээ. Тиймээс энэ удаагийн шүүх хурлаар түүний ялын хэмжээг арван жилээр сунгана хэмээн шинжээчид таамаглаж байна. Үүнээс гадна түүний хамтрагчдын ихэнх нь эрүүгийн хариуцлага хүлээж, олон хүн цөллөгт явсан юм.
Хүний эрхийн Эмнести олон улсын байгууллага тус шүүх хурлыг “Хэвлэл мэдээллийнхэн бус шоронгийн харгалзагчид оролцсон учир хуурамч шүүх хурал. Оросын эрх баригчид Навальныйг шоронгоос гаргахгүй байх арга хэмжээ авч байна” хэмээн тодорхойлжээ. Харин АНУ-ын Төрийн нарийн бичгийн дарга Энтони Блинкен шинэ ялыг эргэлзээ төрүүлж байна хэмээгээд Навальный болон түүний холбоотнуудыг авлигын эсрэг сайн тэмцсэн хэмээн онцолжээ. Мөн тэрбээр Навальныйг суллахыг Оросын эрх баригчдад уриалав.
Хэргийг эргэн сануулвал, Навальный Сибирь рүү явах замдаа хордлогод орж Германд олон сар эмчлүүлсний дараагаар өнгөрсөн оны нэгдүгээр сард эх орондоо буцаж ирсэн билээ.
Эх сурвалж: www.polit.mn