З.БАТЦЭЦЭГ

Шведийн засгийн газар цар тахлын улмаас тавьсан бүх хязгаарлалтаа цуцалжээ. Эрх баригчид энэ алхмаа тус улсад вакцинжуулалт өндөр хувьтай байгаатай холбон тайлбарласан байна. Шведүүд коронавирусийн хүнд хэлбэрээр өвдөж, эрчимт эмчилгээний тасагт хэвтэх нь багасаж байгаа аж. Мэргэжилтнүүдийн энэ өвчний талаарх мэдлэг нэмэгдэж байгааг засгийн газар онцолжээ. “Хэсэг хугацаанд халдварын түвшин өндөр хэвээр байх боловч хамгийн хүнд үр дагавар арилсан бололтой” гэж Шведийн ерөнхий сайд Магдалена Андерсон хэлэв. Хязгаарлалт цуцлагдсаны дараа хүмүүс ханиадны шинж тэмдэг илэрвэл PCR-ын шинжилгээнд хамрагдах шаардлагагүй болно. Мөн эрх баригчид тус улсад нэвтрэх хоригийг цуцалжээ. Олон нийтийг хамарсан арга хэмжээ зохион байгуулахад тавьсан хязгаарлалтыг цуцалж, вакцинжуулалтын гэрчилгээг үзүүлэх шаардлагагүй болно гэв.

Эх сурвалж: www.lenta.ru