Б.ДОЛЖИНЖАВ

Австрали улс вакцины бүрэн тунтай олон улсын аялагчдад энэ сарын сүүлээр хилээ нээнэ гэдгээ тус улсын Ерөнхий сайд Скотт Моррисон өнөөдөр зарлалаа. Австралийн Үндэсний аюулгүй байдлын хороо хуралдаж ийм шийдвэр гаргажээ.

Энэ талаар Скотт Моррисон “Засгийн газар болон Үндэсний аюулгүй байдлын хороо хуралдаж хоёрдугаар сарын 21-нээс  визний шаардлага хангасан бүх хүнд хилээ дахин нээхээр шийдвэрлэлээ. Ингэхдээ хоёр тун вакциндаа хамрагдсан байх ёстой. Энэ дүрмийг хүн бүр биелүүлнэ гэж итгэж байна. Та бүхний виз бол эхний шаардлага. Нэмэлтээр вакцины гэрчилгээ шаардана” гэжээ. Тус улсын насанд хүрсэн иргэдийн 80 хувь нь вакцины бүрэн тундаа хамрагдаад байна.

Австрали улс 2020 оны эхээр ихэнх орны аялагчдад хилээ хаасан. Энэ хязгаарлалтаа өнгөрөгч арваннэгдүгээр сараас сулруулж Шинэ Зеланд, Сингапур, Өмнөд Солонгос, Японы иргэдийг нэвтрүүлэхээр болсон билээ. Одоогийн байдлаар тус улсын иргэд, байнгын оршин суугчид болон тэдний гэр бүл, олон улсын оюутан, цагаачлагч иргэд хоёр тун вакцины гэрчилгээгээ үзүүлэн Австрали руу чөлөөтэй нэвтэрч байгаа юм. Тэгвэл энэ сарын 21-нээс эхлэн жуулчид мөн дээрх журмын дагуу Австралийг зорих боломж нээгдлээ.

Хилээ ийн дахин нээх нь аялал жуулчлалын салбараа дэмжиж буй үйлдэл гэдгийг Мориссон онцолжээ. Тэрбээр “Энэ шийдвэрийг аялал жуулчлалын салбарынхан тэсэн ядан хүлээж байсныг бид мэднэ. Хоёр долоо хоногийн дараагаас Австралид дахин зочлохоор ирэх олон улсын жуулчдыг хүлээн авахдаа аялал жуулчлалын компаниуд бэлтгэх хэрэгтэй” гэсэн юм.

Өнөөдрийн байдлаар Австрали улсад 2.7 сая хүн COVID-19 халдвар авч, 4200 хүн цар тахлаар амиа алджээ.          

Эх сурвалж:CNN