З.БАТЦЭЦЭГ

Францын ерөнхийлөгч Эммануэль Макроны засаг захиргааны ажилтан асан Александр Беналльд гурван жилийн хорих ял оноосны хоёр нь тэнсэн байна. Түүнийг 2018 оны жагсаалын үеэр хүч хэрэглэсэн хэрэгт буруутай гэж үзжээ. Энэ тухай BFMTV телевиз мэдээлэв.

2018 оны 7-р сард Францын хэвлэл мэдээллийн хэрэгслүүд Парист болсон 5 дугаар сарын 1-ний жагсаалын үеэр Беналл жагсагчийг зодсон бичлэгийг нийтэлжээ. Уг бичлэгт хар хамгаалалтын малгайтай, иргэний хувцас өмссөн эрэгтэй бүдүүлэг авир гаргаж, нэгэн эмэгтэйг түлхэжээ. Дараа нь цагдаад бүслэгдсэн залууг барьж аваад газар чирч, олон хүмүүсийн нүдэн дээр зоджээ. Францын удирдагч уг хэргийн шинэ мэдээлэл ил болсны дараа аюулгүй байдлын зөвлөхөө ажлаас нь халсан байна.

Беналлыг хүчирхийлэл үйлдсэн, төрийн албанд хөндлөнгөөс оролцсон, таних тэмдгийг хууль бусаар зүүсэн, видео камерын бичлэгийг нуун дарагдуулсан, мэргэжлийн нууцыг зөрчсөн гэх үндэслэлээр буруутгажээ.

Тэрээр сонгуулийн кампанит ажлын үеэр Эммануэль Макроны хамгаалалтын албаны даргаар ажиллаж байсан бөгөөд дараа нь янз бүрийн арга хэмжээнд төрийн тэргүүний аюулгүй байдлыг хариуцаж байсан. Дуулиант бичлэг тархсны маргаашнаас нь түүнийг ажлаас халжээ.

Эх сурвалж: www.lenta.ru