Б.ДОЛЖИНЖАВ

АНУ-ын Эм, хүнсний хэрэг эрхлэх газар Pfizer/BioNTech үйлдвэрийн вакцинд анхны бүрэн зөвшөөрлөө даваа гарагт олголоо. Үүнээс өмнө тус улсын дархлаажуултдаа ашиглаж байсан COVID-19 эсрэг вакцинууд бүгд шуурхай горимд ашиглах зөвшөөрөлтэй байсан юм. Тиймээс энэ талаар Эм, хүнсний хэрэг эрхлэх газрын тэргүүн Жанет Вүдкок “Манай улсын цар тахалтай тэмцэх үйлсэд чухал үйл явдал болж байна. Эм, хүнсний хэрэг эрхлэх газраас анхны бүрэн зөвшөөрлийг Pfizer вакцинд олголоо. Энэ бүрэн зөвшөөрөл нь вакцины чанар, аюулгүй байдал, үр нөлөөний “алтан стандарт” юм. Тиймээс хүмүүсийн вакцинд итгэх итгэл нэмэгдсэн гэж бодож байна.Вакциныг үргэлжлүүлэн 12-15 насныхан болон дархлаа нь суларсан зорилтот бүлгийнхний нэмэлт тунд ашиглах боломжтой” гэж мэдэгджээ.

 Харин АНУ-ын ерөнхийлөгч Жо Байден “Бүрэн зөвшөөрөл олгосноор вакцины аюулгүй байдал, үр дүнд итгэх итгэл улам нэмэгдэнэ гэдэгт найдаж байна. Хэрэв та вакцинжуулалтад хамрагдаагүй байгаа бол одоо цаг нь боллоо” гэж твиттертээ бичсэн байна. Вашингтоны эрх баригчид 2020 оны арванхоёрдугаар сарын 11-нд Pfizer вакцинд шуурхай горимд ашиглах зөвшөөрөл олгож байсан юм. Үүнээс хойш өнөөдрийн байдлаар АНУ-д 170 сая гаруй хүн бүрэн тун вакциндаа хамрагдсаны 92 сая нь Pfizer/BioNTech компанийн вакциныг тариулжээ.

Бүрэн зөвшөөрөл олгохын тулд 16 ба түүнээс дээш насны 40 мянга гаруй хүн оролцсон туршилтын мэдээлэл, тоо баримтыг нягтлан шалгасан байна. Ингэхэд халдвараас 91 хувийн үр дүнтэй хамгаалж байгааг тогтоожээ. Ийн тавдугаар сараас хойш тус вакциныг 12 ба түүнээс дээш насныханд тарьж эхэлсэн юм. Мөн Pfizer вакциныг 5-11 насныханд тарьж болох эсэх туршилт есдүгээр сарын сүүлээр дуусч, үр дүнгээ зарлана. Хэрэв энэ туршилт амжилттай болбол 2-5 насныханд вакцинаа тарих эсэхийг судлана гэж мэдэгдсэн юм.

Pfizer вакцинд бүрэн зөвшөөрөл олгосны дараа АНУ-ын зэвсэгт хүчин бүх алба хаагчаа есдүгээр сарын дунд үеэс вакцинжуулалтад заавал хамруулах шийдвэрээ зарласан юм.Хувийн компаниуд, их сургуулиуд энэ жишгийг дагах төлөвтэй байна. Тухайлбал, Нью Йорк хотын захиргаа боловсролын салбарын ажилтнуудад есдүгээр сарын 27-ноос өмнө вакцины эхний тунгаа тариулсан байх шаардлага тавихаар болжээ. Энэ тухай АНУ-ын мэс заслын ерөнхий эмч, доктор Вивек Мурти “Ажилчид болон суралцагчдынхаа ажиллах, суралцах аюулгүй орчинг бий болгохоор зорьж байгаа бизнесийн байгууллага болон их сургуулийнханд Pfizer вакцинд бүрэн зөвшөөрөл олгосон үйл явдал төлөвлөсөндөө хүрэхэд тусална гэж найдаж байна. Мөн энэ зөвшөөрлийг хүлээж байсан хүмүүс одоо вакцинаа хийлгэнэ гэдэгт итгэлтэй байна” гэв.

Коронавирусын дельта хувилбарын тархалтын улмаас өнөөдөр тус улсад 80 мянга орчим хүн COVID-19 өвчний хүндрэлээр эмнэлэгт хэвтэж, өдөр бүр дунджаар 700 гаруй хүн нас барж байна.Дельтагийн давалгаанд хамгийн хүнд нэрвэгдсэн бүс нутаг нь Флорида, Алабама, Миссиссиппи, Луйзиана гэсэн өмнөдийн мужууд болжээ. Үүнээс гадна Америк Moderna, Johnson&Johnson гэсэн хоёр вакциныг дархлаажуулалтдаа  ашиглаж байна.

Эх сурвалж: “Зууны эмдээ” сонин

2021.8.25 ЛХАГВА № 166 (6643)