Х.ОЮУНБОЛД
ОХУ-аас АНУ-д суугаа элчин сайд Анатоли Антонов АНУ-ын зарим улс төрч зөвхөн Москвагийн эдийн засаг, бие даасан гадаад бодлогыг өөрчлөхийн тулд Украиныг зэвсэг болгон ашиглаж байна гэж мэдэгджээ. Тэрээр энэ тухай Вашингтоны зүгээс “Умардын хоолой 2” төслийг эсэргүүцэж байгаа талаар “RT” телевизээр ярьсан байна. Анатоли Антонов энэ төслийг цэвэр эдийн засгийн төсөл гэж онцолжээ. Мөн эрчим хүчний зах зээлийг төрөлжүүлэх зорилготой гэж тодорхойлсон байна. Түүнээс гадна АНУ, ОХУ цаг уурын өөрчлөлт, олон улсын алан хядах ажиллагаа, Вашингтон цэргээ нэгмөсөн татаж гаргасны дараа Афганистаны нөхцөл байдал гэсэн сэдвийн талаар хэлэлцэхийн тулд хамтран ажиллахад төвлөрч анхаарах ёстой гэв. ОХУ-ын эрчим хүчний “Газпром” компани болон Европын таван компанийн хамтарсан энэ төслөөр барьж байгаа хийн хоолойгоор Балтийн тэнгисээр дамжуулан ОХУ-аас Герман хүртэл жилд 55000 тэрбум метр куб байгалийн хийг тээвэрлэхээр төлөвлөсөн байна.
Эх сурвалж: “Зууны мэдээ” сонин
2021.7.22 ПҮРЭВ № 142 (6619)
