• Зууны мэдээ сонин онлайн захиалга

Австрали:Хөл хорио ч дельта вирусыг зогсоож чадсангүй

2021-06-27 15:20

 

Б.ДОЛЖИНЖАВ

Халдварыг хяналтнаасаа алдахгүйгээр тогтмол барьж байсан учир Австрали улс хатуу хязгаарлалт тогтоож байгаагүй. Гэвч сүүлийн өдрүүдэд халдварын тоо, тэр дундаа мутацид орсон вирус тархаж эхэлсэнтэй холбоотойгоор Австралийн Сидней  болон хэд хэдэн хот хоёр долоо хоногийн турш анх удаа хатуу хөл хорио тогтоосон. Гэсэн хэдий ч  Шинэ Өмнөд Уэльс мужид хоёр дахь өдрөө 30 шинэ тохиолдол бүртгэгдсэнийг өнөөдөр зарлалаа.  Ийн тус мужид дельта хувилбараар халдварласан иргэний тоо 110 хүрсэн бөгөөд цаашид нэмэгдэх төлөвтэйг мужийн захирагч анхааруулжээ.

Энэ талаар Шинэ Өмнөд Уэльс мужийн захирагч Глэдис Бережиклиан “Мутацид орсон вирус ямар их аюултай байдгийг сүүлийн хэд хоног бид мэдэрлээ. Хөл хорио тогтоож, өөрсдийгөө тусгаарласан ч халдварын тоо цаашид нэмэгдсээр л байна. Учир нь бид хэдийнэ дотор орчинд мутацид орсон вирусыг тараажээ” гэж ярьсан байна. Харин мужийн Эрүүл мэндийн сайд Брэд Хаззард “Энэтхэгт анх илэрсэн дельта хувилбар бол маш аймшигтай дайсан. Бид ч ямар хязгаарлалт тогтоосон энэ вирус хэрхэн халдварлахаа мэддэг бололтой” гэв.

Тиймээс хэд хэдэн муж ирэх сарын 9 хүртэл иргэдээ гэртээ байхыг уриалжээ. Энэ тухай Ерөнхий сайд Скотт Моррисон “Хөл хорионд тэвчээртэй байгаа иргэддээ баярлалаа. Бид хамтдаа энэ хэцүү цаг үеийг даван туулна. Дэлхийн эргэн тойронд уй гашуу авчирч байгаа цар тахлын нөлөө өдрөөс өдөрт Австралид ойртсоор байна” гэв. Энэ халдварын тархалтыг вакцинжуулалт удаан байгаатай холбоотой хэмээн шүүмжлэгчид Засгийн газрыг буруутгаж байна. Учир нь хэрэв хүн амын ихэнх нь вакциндаа хамрагдсан бол хөл хорио тогтоох шаардлагагүй байсан гэж ажиглагчид үзэж байна.Учир нь одоогийн байдлаар Австралийн насанд хүрсэн хүн амын гурван хувь нь бүрэн тундаа, 25 хувь нь эхний тундаа хамрагджээ.

Эх сурвалж:BBC

АНХААРУУЛГА: Уншигчдын бичсэн сэтгэгдэлд манай сайт хариуцлага хүлээхгүй болно. Та сэтгэгдэл бичихдээ бусдын эрх ашгийг хүндэтгэн үзнэ үү.