Б.ДОЛЖИНЖАВ

Гурван өдөр үргэлжилсэн Их-7-гийн дээд хэмжээний уулзалтаар баян орнууд ядуу орнуудын COVID-19 эсрэг вакцины төлбөрийг төлөх тохиролцоонд хүрсэн. Үүнтэй холбогдуулан баян орнууд нөөцөлсөн их хэмжээний вакцинаа ядуу орнуудад нэг дор илгээвэл хэдэн сая тун вакцин хаягдахад хүрч болзошгүй гэдгийг UNICEF анхаарууллаа. Учир нь буурай орнууд нэг дор их хэмжээний вакциныг нөөцлөх боломжгүй байдаг тул тогтвортойгоор бага багаар нийлүүлэх нь оновчтой гэж үзлээ.

Англи тэргүүтэй Их-7-гийн орнууд ядуу орнуудад илүүдэл вакцинаа хандивлахаа амлаад байгаа юм. Харин буяны байгууллагуудаас тэднийг вакцинаа илүү эрт нийлүүлэхийг хүслээ. UNICEF-ийн энэ санаачилгыг Billie Eilish, David Beckham, Andy Murray, Liam Payne, Priyanka Chopra Jonas, Orlando Bloom, Katy Perry, Gemma Chan, Whoopi Goldberg, Claudia Schiffer тэргүүтэй алдартнууд дэмжлээ. Тэд Их-7-гийн орон тэр дундаа Английг наймдугаар сар гэхэд вакциныхаа 20 хувийг хандивлахыг хүссэн захидалд  гарын үсгээ зурсан байна.

UNICEF-ийн вакцины асуудлыг хариуцсан мэргэжилтэн Лили Капрани “Ямар ч эргэлзээгүйгээр бүх орон 18-аас доош насныхнаа вакцинжуулах шаардлагатай болно. Гэхдээ дэлхийн эргэн тойрон дахь эмзэг бүлгийнхнийг вакцинжуулахад анхаарах нь бидний нэн тэргүүний зорилго юм. Өөрийн орны хүн амаа вакцинжуулсан Англи тэргүүтэй Их-7 орон одоо бага орлоготой орнуудад вакцинаа хандивлах хэрэгтэй. Учир нь сая сая тун вакциныг хэрэглээгүй байхад хугацаа нь дуусч байгааг харах харамсалтай байна” гэв.  

Англи улс 400 сая тун вакцинд иргэдээ хамруулаад байгаа бол зарим орон эхний тун вакцинаа ч хүлээн авч чадаагүй байна. Тиймээс ДЭМБ COVAX хөтөлбөрөөр дамжуулан эдгээр орнуудад вакцин түгээхээр зорьж байгаа юм.

Англи COVAX хөтөлбөрт вакцин хандивлахаа амласан ч тоог нь тодорхой хэлээгүй. Гагцхүү илүүдэл вакцинаа нийлүүлнэ гэсэн юм. Гэвч тус улсад одоогийн байдлаар илүүдэл тун байхгүй гэдгийг Эрүүл мэндийн сайд Мэт Хэнкок баасан гаригт мэдэгдсэн юм. Гэхдээ Английн Засгийн газар COVAX хөтөлбөрт 548 сая паунд хандивлаж, үүгээр нь хагас тэрбум тун AstraZeneca вакцин худалдан авч бусад орон руу илгээжээ.

Эх сурвалж:BBC