Б.ДОЛЖИНЖАВ

ДЭМБ-аас Англи, Өмнөд Африк, Энэтхэг бүртгэгдээд байгаа COVID-19-ийн мутацид орсон шинэ хувилбаруудад Грек цагаан толгойн нэр оноохоор болжээ. Тодруулбал, Англид бүртгэгдсэн хувилбарыг Альфа, Өмнөд Африкт бүртгэгдсэнийг Бета, Энэтхэгт бүртгэгдсэнийг Дельта гэж нэрлэхээр болсныг зарласан байна.

Энэ нь мутацлагдсан хувилбаруудыг шинжлэх ухаанд тоо, үсэг холилдсон нэрээр нэрлэдэг нь олон нийтийн дунд ярих, бичихэд төвөгтэй байдгаас гадна вирусын хувилбарыг улсын нэрээр нэрлэхээс сэргийлж байгаатай холбоотой юм.  Учир B.1.1.7 хувилбарыг “Британи хувилбар”,  өнгөрсөн оны аравдугаар сард Энэтхэгт анх бүртгэгдсэн B.1.617.2 хувилбарыг “Энэтхэг хувилбар” хэмээн нэрлэхээ зогсоохыг тус улсын Засгийн газар шаардаж байв.

Гэхдээ Грек цагаан толгой нь 24 үсэгтэй учир 24-өөс олон хувилбар бүртгэгдвэл өөр нэршил оноох юм байна. Энэ талаар ДЭМБ-ын төлөөлөгч “Бид өмнөх B.1.1.7 гэсэн нэршлийг солиогүй. Харин энгийн хүмүүс хоорондоо харилцахад амар байлгахад туслахыг хичээж байгаа юм. Тухайлбал, олон нийтийн хэлэлцүүлэг хийхэд дуудахад амар нэр байх хэрэгтэй” гэж ярив.

ДЭМБ өнөөдрийн байдлаар дөрвөн хувилбарыг “global concern” буюу дэлхийд аюул учруулж буй хувилбар гэсэн ангилалд оруулаад байгаа. Эдгээр нь Британи, Бразил, Өмнөд Африк, Энэтхэгт илэрсэн хувилбарууд юм. Ийн B.1.1.7 гэж шинжлэх ухаанд нэрлэгдсэн Их Британи хувилбарыг Альфа, B.1.351 гэж нэрлэгдсэн Өмнөд Африкийн хувилбарыг Бета, P.1 гэж нэрлэгдсэн Бразил хувилбарыг Гамма гэж нэрлэхээр тогтлоо.

Энэтхэгээс илэрсэн B.1.617 хувилбар нь дотроо хоёр дэд хувилбарт хуваагдаж байгаа тул B.1.617.2 дэд хувилбарыг Дельта, B.1.617.1 дэд хувилбарыг Каппа гэж нэрлэхээр болсон байна.Шинэ нэрсийг хэрэглэж заншихыг ДЭМБ дэлхийн улс орнууд, хэвлэл мэдээллийн байгууллагуудад уриалжээ.

 Эх сурвалж:BBC