Х.ОЮУНБОЛД
АНУ Афганистанаас татан гаргаж байгаа цэргүүдээ тус бүс нутагт тогтоосон нөлөөгөө алдахгүйн тулд хөрш орнуудад нь байрлуулахыг зорьж байна гэж ОХУ-ын тагнуулын албаны дарга Сергей Наришкин мэдэгджээ. Тэрбээр “АНУ-ын Засгийн газар цэргээ татах шийдвэрийг гаргахдаа тэр газар нутагт тогтоосон хяналтаа алдахыг хүсээгүй нь тодорхой байна. Тиймээс одоо хамгийн багадаа Афганистанд байгаа нөөцийн нэг хэсгийг хөрш орнуудад нь байрлуулахаар төлөвлөж байна” гэж сэтгүүлчдэд ярьсан байна.
Түүнээс гадна ОХУ-ын тагнуулын алба энэ талаар оролдлого хийж эхэлсэнтэй холбоотой баримт, мэдээлэл байна гэв. Сергей Наришкин “Бид зөвхөн манай түнш орнууд болон Аюулгүй байдлын хамтын гэрээний байгууллагын гишүүн холбоотнууд нь зөвшөөрөхгүй гэж итгэж байна” гэж дурдсан байна. Харин үүний өмнө “Валл Стрийт Журнал” сонин “Вашингтон Афганистанаас татан гаргаж байгаа цэргүүдээ хэдийгээр ярилцаж тохиролцоогүй ч Тажикстан, Узбекистанд байрлуулах боломжтой гэж эх сурвалжаас эш татан мэдээлсэн юм. Мөн “Спутник”-ээс явуулсан судалгаанд оролцсон мэргэжилтнүүдийн хэлснээр Москватай нягт холбоотой Ташкент болон Душанбе энэ санааг нь дэмжихгүй аж. АНУ есдүгээр сарын 11-н гэхэд татаж дуусгахаар төлөвлөсөн үйл ажиллагааныхаа хүрээнд Афганистанд байгаа цэргийнхээ тоог энэ сарын 1-нээс багасгаж эхэлсэн юм.
Эх сурвалж: www.polit.mn