Б.ДОЛЖИНЖАВ

Филиппин улсын ерөнхийлөгч Родриго Дутерте  БНХАУ-ын Синофарм үйлдвэрийн COVID-19 эсрэг вакцины эхний тунд хамрагдаж байгаагаа даваа гаригт шууд дамжуулан хүргэж, иргэдээ вакциныг хамрагдахыг уриалсан. Гэвч тэрбээр  ДЭМБ болон улсдаа зөвшөөрөөгүй вакциныг хийлгэхийг уриаллаа хэмээн ажиглагчдын шүүмжлэлд өртлөө.

Үүний дараахан Дутерте зөвшөөрөл олгоогүй вакцин тариулсандаа олон нийтээс уучлалт гуйгаад Хятадын тус улсад хандивласан 1000 тун Синофармын вакциныг буцаах хүсэлтийг лхагва гаригт тавьжээ.

Тодруулбал, Филиппиний Ерөнхийлөгч Родриго Дутерте  “Хандивын Синофармын вакцинаа илгээхээ зогсоо. Үүний оронд танай улсын хүн бүр  хамрагдсан Синовакын вакцинаасаа бидэнд өгөөч” хэмээн Хятадын Элчин сайдын яаманд хэлжээ. Синовакын вакциныг яаралтай ашиглах зөвшөөрлийг Филиппиний Хүнс, эмийн захиргаа хоёдугаар сард өгсөн. Харин Синофарм компаниас гуравдугаар сарын эхээр хүсэлт гаргасан ч Филиппиний Хүнс, эмийн захиргаа зөвшөөрөөгүй юм. Гэхдээ ДЭМБ-аас Синофарм болон Синовакын вакцинд энэ долоо хоногийн сүүлээр зөвшөөрөл олгох шийдвэрээ танилцуулах магадлал өндөр байгааг мэдэгдсэн юм.

Барууны орнуудын зүгээс Хятадын хоёр вакцин бусад вакцинаас үр дүнгийн хувь бага, сүүлийн шатны туршилтийн судалгааны дүн хангалтгүй хэмээн  шүүмжилж байгаа юм. БНХАУ-д үйлдвэрлэсэн дээрх хоёр вакцин туршилт хийсэн өөр өөр улсад халдвараас хамгаалах хувь нь өөр байсан боловч ДЭМБ-аас 50 хувийн үр нөлөө үзүүлсэн вакцинд яаралтай ашиглах зөвшөөрлийг олгодог юм.

Энэтхэгт вакцин хомсдож, AstraZeneca вакцины экспортыг зогсоосон энэ цаг үед ДЭМБ-аас зөвшөөрлөө авчихбал БНХАУ дээрх хоёр вакцинаас COVAX хөтөлбөрт хандивлах эрх нээгдэнэ. Учир нь COVAX хөтөлбөр ДЭМБ-аас зөвшөөрсөн вакцинуудыг ядуу, буурай орнуудад хандивлаж байна. Иймээс Хятад өөрсдөө бие даан бусад оронтой гэрээ байгуулан вакцин хандивлаж байгаагийн дотор Филиппин багтсан юм. Энэ дэмжлэгийг судлаачид хамгийн эмзэг бүлгийн орнуудад туслах  ашиг сонирхол хэмээн дүгнэж байна.

Эх сурвалж:CNN