Б.ДОЛЖИНЖАВ

Цэргийн хүчнийхэн Засгийн эрхийг гартаа авсныг эсэргүүцсэн жагсаал Мьянмар улсад хоёрдугаар сарын 1-нээс хойш үргэлжилж байна. Тус улсад үүссэн   хямралыг хэрхэн давах, үймээнийг яаж зогсоох талаар Зүүн Өмнөд Азийн орнуудын холбоо бямба гаригт  Жакарта хотод хэлэлцэнэ гэж АСЕАН–ийн нарийн бичгийн дарга өнөөдөр мэдээллээ. Үүнээс өмнө Европын холбоо цэргийнхний эсрэг хатуу арга хэмжээ авсан. Тухайлбал, цэргийн нэр бүхий есөн албан тушаалтанд аялалын хориг тавьж, хөрөнгийг нь битүүмжилж байгаагаа өчигдөр зарласан юм. Америк мөн ижилхэн арга хэмжээ авсан.

Тус холбооны 10 гишүүн орон Мьянмарыг цуст мөргөлдөөн, үймээнээс аврах арга замыг эрэлхийлж байна. Хэдий тооны удирдагч оролцох нь тодорхойгүй ч Мьянмарын Армийн удирдагч Мин Аун Хлайн тус хуралд оролцоно гэдгийг Тайландын Засгийн газар мэдэгдээд байгаа юм.

 Гэвч Мьянмарын өмнөх удирдагч Аун Сан Сү Чи-гийн намаас хөөгдсөн ардчиллыг дэмжигч улс төрчид Үндэсний эвлэлийн Засгийн газар (NUG) байгуулснаа баасан гаригт зарласан билээ. Тэд өөрсдийгөө хууль ёсны эрх баригчид  гэдгээ олон улсад зөвшөөрүүлж Мин Аун Хлайны оронд АСЕАН-ий уулзалтад урихыг уриалсан юм. Мьянмарын төв хэвлэл даваа гаригийн байдлаар 128 иргэн амиа алдсан гэж мэдээлсэн ч Улс төрийн хоригдлуудад туслах холбоо (AAPP)  738 иргэн цэргийнхний гарт амиа алдсан гэж мэдэгдлээ.

Эх сурвалж:Reuters