Б.ДОЛЖИНЖАВ

Цар тахлын улмаас 525  мянган иргэнээ алдсан Америк вакцинжуулалтдаа бүрэн хамрагдсан иргэдээ хэвийн амьдралдаа шилжиж болно гэдгийг өчигдөр зарлалаа.Энэ тухай АНУ-ын Халдварт өвчнийг хянах, урьдчилан сэргийлэх төвийн захирал асан Том Фриден “Энэ бол шинжлэх ухааны үндэслэлтэй шинэ удирдамж. Та хүүхдүүдээ тэвэрч болно. Үсчин орж, шүдээ үзүүлж, хүсэн хүлээж байсан бүхнээ хийх боломжтой” гэж  ярилаа.

Шинэ удирдамжинд вакцинд хамрагдсан хүмүүс нэг нэгнийдээ зочлохдоо маск зүүж, зай баримтлах шаардлагагүй. Вакцинд хамрагдаагүй ч шинж тэмдэг илрээгүй, эрсдэл багатай хүмүүс нэг нэгнийдээ зочилж болно. Вакцинд хамрагдсан хүн халдвартай хүнтэй ойртсон ч шинж тэмдэг илрээгүй бол шинжилгээ өгч, тусгаарлагдах шаардлагагүй болох юм.Энэ шинэ журам Pfizer  болон Moderna вакцины хоёр тунг тариулснаас, Johnson & Johnson вакцины нэг тунг тариулснаас 14 хоногийн дараа үйлчилж эхэлнэ. Энэ тухай Доктор Леана Вен “Хэрэв та хоёр тун вакциндаа хамрагдсан бол соёл урлагийн үйл ажиллагаанд очиж, музей үзэж, хайртай хүмүүс рүүгээ зочилж, аялалаар явж, хүссэн бүхнээ хийж болно” гэв.

АНУ-д хэдийнэ 60 сая хүн эхний тунгаа, 30 гаруй сая хүн хоёр дахь тундаа хамрагджээ. Зун гэхэд энгийн амьдралдаа шилжихийн тулд Америк өдөрт хоёр сая гаруй хүнийг вакцинд хамруулж байна. Бүрэн хамрагдсаны дараа хэвийн амьдралдаа шилжинэ гэсэн журам нь вакцинд үл итгэгчдийг шийдвэрээ өөрчлөхөд хүргэж, сүргийн дархлааг хурдан тогтооход тусална гэж үзэж байна.

Техас, Миссиссиппи муж зоогийн газар, спорт заал, бараа нээж, маскгүй байхыг хүлээн зөвшөөрчээ. Гэхдээ Англид тархсан шинэ хувилбарын халдвар Флорида мужид хурдацтай нэмэгдэх вий гэдэгт санаа зовниж байна.

Эх сурвалж:CNN