Б.ДОЛЖИНЖАВ

Тайванийн Ерөнхийлөгч Цай Инг Вен Хятадад Цагаан сарын баярын мэндчилгээг өчигдөр хүргэлээ. Энэ үеэрээ Бээжингээс тус улсад үзүүлж байгаа дарамт шахалтад бууж өгөхгүй учир яриа хэлэлцээрээ сэргээхийг уриалав.
Энэ талаар Цай “Хятадын цэргийн нисэх онгоцнууд Тайванийг тойрон нисч байгаа нь энх тайван байдалд садаа болж байна. Энэ харилцааг зөөлрүүлэхийн тулд Хятадыг тэгш эрхийг хангасан, харилцан бие биенээ хүндэлсэн утга учиртай хэлэлцээр хийхийг хүсч байна. Хоёр эргийн энх тайван байдал бол дан ганц Тайванийн асуудал биш. Асуудлыг шийдэх түлхүүр Хятадын гарт байна. Манай улсын эсрэг хүчтэй мэдэгдэл хийж, цэргийн хүчээр далайлгах нь харилцааг шийдвэрлэхэд туслахгүй гэдгийг түүхэн туршлагууд баталсан. Тайван, Хятад хоёр энэ долоо хоногт уламжлалт Цагаан сарын баяраа тэмдэглэж, хаврын улирлыг угтах гэж байна. Тиймээс нөгөө эрэгт орших иргэддээ шинэ оны мэнд хүргэе. Хоёр тал тогтвортой, энх тайван байдлыг хамтдаа ахиулна гэдэгт итгэлтэй байна” гэж ярьжээ. Хятад Тайванийг өөрийн нэгэн муж гэж үздэг. Гэтэл ардчилсан Тайвань улс салан тусгаарлах тухай ярианаас үүдэн сүүлийн саруудад тус хоёр улсын харилцаа муудаж, цэргийн бэлтгэлээ хийж эхлээд байгаа билээ.

Эх сурвалж: "Зууны мэдээ" сонин 2021.2.10 ЛХАГВА № 29 (6506)