Х.ОЮУНБОЛД

Берлинд суугаа ОХУ-ын Элчин сайд Сергей Нечаев “ОХУ, Герман, Европын холбоо эрчим хүчний бодлогоо гадны хөндлөнгийн оролцоо, зааваргүйгээр тодорхойлж чадна. Мөн үр өгөөжтэй хамтын ажиллагаанд суурилсан 50 гаруй жилийн туршлагатай” гэж “Норд стрим-2” хийн хоолойн төслийн талаар дурдахдаа Германы “Берлинер Зейтунг” сонинд ярьжээ. Тэрээр “АНУ-ын ерөнхийлөгч Доналд Трампын үед сүрдүүлэг, хориг тавих, дарамт үзүүлэх замаар энэ төслийг зогсоохыг зорьж байсан нь хууль бус оролдлого” гэж дүгнэсэн байна. Мөн одоогийн ерөнхийлөгч Жо Байдены Засгийн газар тэдний хөршүүд болон худалдааны үндсэн зарчмуудыг хүндэтгэж үзнэ гэж найдаж байна гэв. Сергей Нечаев “Хийн хоолойн төсөл нь Герман болон Европын хэрэглэгчдийн сонирхолтой холбоотой. Мөн эрчим хүчийг төрөлжүүлэхэд хувь нэмрээ оруулахаас гадна Германы эрчим хүчний аюулгүй байдал ногоон эрчим хүчинд шилжсэнээр нэмэгдэнэ” гэж онцолжээ. Хэрэв энэ төслийг хойшлуулж зогсоовол зөвхөн тэрбум тэрбумаар үнэлэгдэх хөрөнгө оруулалтыг алдана гэсэн үг биш. Мөн гарын үсэг зурсан гэрээний үнэ цэнд итгэж байгаа хөрөнгө оруулагчдын итгэлийг багасгана. Түүнээс гадна сөрөг үр дагаварт хүргэх болон тэдний хувийн сонирхлоо хангахын тулд улс төрийн болон протекционист арга хэмжээг хэрэгжүүлэх хүслийг дэмжих болно гэж ярьжээ. Тэрээр “ОХУ-ын байгалийн хийний улмаас Европын хараат байдал нэмэгдэж байна гэж мэдэгдсэн нь үндэслэлгүй мэдэгдэл юм. Олон ханган нийлүүлэгч, хангамж нийлүүлэх сувгууд байдаг. Гэхдээ хэн нь ч монополь эрх тогтоогоогүй” гэж мэдэгджээ.

Эх сурвалж: www.polit.mn