Б.ДОЛЖИНЖАВ

АНУ-ын 46 дахь Ерөнхийлөгчөөр сонгогдсон Жо Байдены төлөөгчдийн саналыг тоолж, ерөнхийлөгчөөр батлах үеэр Конгрессын танхим руу Трампыг дэмжигч иргэд дайрч, үймээн дэгдээж, таван хүн нас барсан харамсалтай үйл явдал энэ сарын 6-нд болсон билээ. Тэгвэл камерын бичлэгээс харахад энэ зэвсэгт  үймээн хяналтнаас гарсан жирийн нэг жагсаал биш урьдчилан төлөвлөсөн байсан бослого хэмээн үзэж байгаагаа Холбооны хууль сахиулах байгууллагын ажилтан ярьжээ.

Цагаан ордны гадаа жагсагчдаас зарим нь эрт буцаж, эргэн ирэхдээ үймээндээ ашиглах зэвсэгээ авчирсан гэсэн баримтыг Холбооны мөрдөх товчоо илрүүлэн шалгаж байна.   Тус товчоо лхагва гаригт Капитолын ордны үймээний талаарх 126 мянган цахим мэдээлэл, саналыг хүлээн авчээ. Эдгээр баримт дотор эсэргүүцлийн жагсаалд Конгрессын зарим гишүүн оролцсныг харсан талаарх мэдээлэл ч багтжээ. Хэдийгээр Конгрессын гишүүд жагсаалд оролцсон байх боломжгүй ч гэлээ нэхэмжлэлийн үнэн зөвийг шалгана гэдгээ Холбооны мөрдөх товчоо мэдэгдэв.

Тангараг өргөх ёслолын үеэр дахин үймээн дэгдээхгүйн тулд зарим нэг баривчилгааг зайлшгүй хийх ёстой гэж үзэж байна. Тиймээс тэд Капитолын үймээнийг  өдөөсөн нийтлэл цахим орчинд бичсэн гэсэн хэрэгт буруутган 40 настай Эдвард Флореаг гэрээс  нь мягмар гаригт баривчилсан юм. Тэрээр өөрийгөө “Бахархалт хүү” хэмээн нэрлэхийн сацуу гэртээ сум хадгалж байсан аж. Мөн мөрдөгчид жагсаалд оролцсон хүмүүсийг гэр рүү нь очихоос өмнө хэргээ хүлээхийг санал болгожээ. АНУ-ын прокурор Майкл Шервин “Бид жагсагдын хөрөнгө, аялалын маршрут, зан байдал, шилжилт хөдөлгөөн, харилцаа холбооны бүртгэлийг нэг бүрчлэн шалгаж байна. Учир нь энэ үймээн хэрхэн эхэлж, хэн удирдсаныг тодорхойлохыг хичээж байна” гэсэн юм.

Эх сурвалж:CNN