З.БАТЦЭЦЭГ

-Ерөнхий сайд Ёсихидэ Суга уг шийдвэр нь Токиод болох Олимпийн эрсдэлтэй холбоогүй гэлээ-

Японы Засгийн газар хоёрдугаар сарын 7 хүртэл улс хоорондын зөвшилцлийн дагуу 11 орны бизнесменүүдыг хилээр нэвтрүүлж байсныг түр зогсоолоо. Энэ тухай лхагва гарагт Ерөнхий сайд Ёсихидэ Суга Токиод хэвлэлийн хурлаар хэллээ.

“Хоёр талын зөвшилцлийн дагуу 11 орны бизнес зорилгоор ирсэн, явсан зочдоос коронавирусын шинэ хэлбэр илрээгүй. Гэвч манай улс орны дотоод нөхцөл байдал мөн Бразилаас ирсэн хүнээс бас нэгэн шинэ хэлбэрийн коронавирус илэрсэн учраас бид хоёрдугаар сарын 7 хүртэл, онцгой байдлын хугацаа дуустал виз олгохгүй” гэж тэрээр мэдэгдлээ.

Ерөнхий сайд Суга мөн энэ шийдвэр нь Токиод болох Олимпийн эрсдэлтэй холбоогүй гэдгийг онцлон хэллээ.

Коронавирусын шинэ штамм гарсантай холбоотойгоор Японы Засгийн газар 12 дугаар сарын 28-наас нэгдүгээр сарыг дуустал виз олгохоо зогсоогоод байсан юм. Одоо Япон руу зөвхөн тухайн улсын иргэн, тэнд удаан хугацаагаар амьдардаг гадныхан, урт хугацааны визтэй хүмүүс нэвтэрч болно. Хэрвээ тэд коронавирусын шинэ төрөл илэрсэн улсаас ирж байгаа бол 72 цагийн өмнөөс шинжилгээ өгч сөрөг гарсан хариутай байх. Японд ирмэгцээ онгоцны буудал дээр дахин шинжилгээ өгнө.

Үүнээс өмнө бизнес чиглэлээр 11 орон болох Хятад, Өмнөд Солонгос, Вьетнам, Тайланд, Сингапур, Малайз зэрэг орноос зорчиж болох байсныг Японы Засгийн газар мөн цуцаллаа.

Халдварын тархалт

Японд халдварын тархалт 11 дүгээр сараас эхлэн хүндэрч, 12 дугаар сард халдвар авсан хүний тоо, нас барсан хүний тоо өдөр бүр шинэчлэгдсэнээр нэгдүгээр сард оргил үедээ хүрээд байна. Одоогийн байдлаар Японд коронавирусын улмаас амь насаа алдсан хүний тоо 4000, нийт халдвар авсан хүн 300 мянга даваад байна. 

Үүнтэй холбоотойгоор Засгийн газраас нэгдүгээр сарын 7-ноос нэг сарын хугацаатай Токио, түүний ойролцоох Канагава, Сайтама, Тиба мужид онцгой байдал зарлаад байна. Лхагва гарагт өөр бүсийн 7 мужийг бас нэмэн хөл хорио тогтоожээ. Үүнээс гадна баруун өмнөдийн Кумамото муж дотроо онцгой байдал зарлалаа. Нийт хөл хорио тогтоосон бүсэд 73 сая хүн амьдардаг нь тус улсын хүн амын талаас илүү нь юм.

Эх сурвалж:  www.tass.ru