Б.ДОЛЖИНЖАВ

Шинэ төрлийн коронавирус буюу COVID-19-ийн шинэ хувилбарын вирус Их Британи улсад бүртгэгдэж, өмнөх вирусаас хэд дахин хурдацтай тархаж буйг эрүүл мэндийн ажилтнууд нь мэдээлсэн билээ. Энэ вирусын эх үүсвэрийг судлахаар ДЭМБ, Британийн судлаачидтай хамтран ажиллаж байгаа юм.Дэлхийн бусад улс орнууд шинэ хувилбарын COVID-19 вирус дэгдсэнтэй холбоотойгоор Их Британи руу хийх нислэгээ зогсоогоод байгаа юм. Харин АНУ-ын хувьд Британиас ирж байгаа хүмүүс шинжилгээ заавал өгсөн байхыг шаардаж байгаа талаар Трампын Засгийн газрын хоёр албан тушаалтан мэдээллээ.

Халдварт өвчин болон харшлын үндэсний хүрээлэнгийн захирал, доктор Энтони Фаучи “Их Британид тархсан коронавирусын шинэ хувилбар АНУ-д аль хэдийнэ орж ирсэн байх магадлалтай.  Гэхдээ нэг их өргөн хүрээнд тархаж амжаагүй” гэж даваа гаригт ярьсан юм. Шинэ хувилбараас үл хамааран АНУ халдварын тархалтыг зогсож чадахгүйд хүрсэн төдийгүй эмнэлгийн ачаалал хэд дахин нэмэгдээд байна.

Q: Вакцин шинэ хувилбарын вирусын эсрэг үйлчлэх үү?

A:  Pfizer, BioNTech хоёрын хамтарсан болон  Moderna компанийн вакцин хоёулаа сүүлийн шатандаа 95 хувийн үр дүн үзүүлсэн. Гэхдээ энэ нь Их Британид хурдацтай тархаж буй шинэ хувилбарын вирусны эсрэг үйлчлэх үү гэсэн олон асуулттай бид тулгарлаа. “Вакцин вирусын ганцхан хувилбарыг эсэргүүцэх чадвартай гэж би бодохгүй байна. Гэхдээ яг одоогийн нөхцөлд үүнийг бүрэн хэлж чадахгүй” гэж “Operation Warp Speed”-ийн шинжлэх ухааны ахлах зөвлөх Монсеф Слауи ярьсан. Гэвч Moderna болон Pfizer компани хоёулаа вирусын шинэ хувилбарын эсрэг вакцин нь үйлчлэх эсэхийг туршиж байгаа гэдгээ зарласан. Тодруулбал, BioNTech компанийн гүйцэтгэх захирал Угур Сахин “Pfizer болон BioNTech хоёрын хамтарсан вакцин  COVID-19-ийн шинэ хувилбарын эсрэг  үйлчилнэ гэдэгт бүрэн дүүрэн итгэлтэй байна. Гэхдээ хоёр долоо хоногийн дараа дүн тодорхой болно” гэсэн юм.

Эх сурвалж:CNN