Б.ДОЛЖИНЖАВ

Тухайн жилийн  салбар бүрийн хамгийн нөлөө бүхий хүнийг шалгаруулдаг “Time” сэтгүүл энэ оны шилдгүүдээ зарлаж эхэллээ. Бизнесийн салбарын оны шилдгээр цахим видео хурлын “Zoom” аппликейшнийг үүсгэн байгуулагч, компанийн гүйцэтгэх захирал  Эрик Юаныг нэрлэжээ. Энэ тухай “Тусгаарлагдсан ноцтой цаг үед “Zoom” харилцааны холбооны гол хэрэгсэл, бидний амьдралын аврагч болсон” гэж Time сэтгүүл бичжээ. Одоо 50 настай Эрик Юань Хятадад төрсөн АНУ-ын тэрбумтан юм. Энэ оны арваннэгдүгээр сарын байдлаар түүний хөрөнгийн хэмжээ 17 тэрбум ам долларт хүрсэн байна. Энэ нь цар тахлын үеэр буюу энэ жилийн эхэн үеэс эхлэн 360 хувиар өссөн дүн юм.

Тэрээр 1997 онд "Цахиурын хөндий"-д ирж технологийн салбарт хүчээ сорьж эхэлжээ. Тийн “Zoom” видео харилцааны компаниа 2011 онд байгуулсан юм. Энэ компани 2019 оноос олонд танигдаж, Эрик Юань тэрбумтан болсон түүхтэй.

“Time” сэтгүүлийн энэ оны шилдгүүд

1.АНУ-ын Халдварт өвчний хамгийн шилдэг шинжээч, доктор Энтони Фаучи. “Цар тахлын голомтод ажиллаж байгаа эрүүл мэндийн ажилтнууд хувиа хичээх үзэлгүй, өрөвдөх сэтгэлтэй, тэсвэр тэвчээртэй, эр зоригтой дэлхийн хамгийн сайн хүмүүс байдгийг тэр гэрчлэн харуулсан” гэж “Time” сэтгүүл бичжээ.

2.Арьс өнгөөр ялгаваран гадуурхах үзэл, шударга ёсны хөдөлгөөнийг зохион байгуулагчид Порше Беннет-Бэй, Асса Траоре

“Миннеаполис хотод тавдугаар сард Жорж Флойд амиа алдсан нь Америк улсад одоо ч өнгөт арьстнуудад тэгш эрх байхгүйг гэрчилсэн билээ. Түүний үхлийн дараа сая сая хүн гудамжинд эсэргүүцлийн жагсаал зохион байгуулсан нь дэлхий ертөнцөд тэгш бус байдал манай оронд байхгүйг таниулсан чухал үйл явдал болсон юм” гэж “Time” сэтгүүл бичсэн байна.

3.Оны шилдэг тамирчнаар АНУ-ын сагсанбөмбөгийн од Леброн Жэймс

4.Соёл урлагийн салбарын шилдгээр Өмнөд Солонгосын BTS хамтлаг тус тус шалгарчээ.

Өнгөрсөн жилийн тус сэтгүүлийн “Оны онцлох хүн”-ээр Шведийн 16 настай сурагч, уур амьсгалын өөрчлөлтийн эсрэг хөдөлгөөнийг удирдагч Грета Тунберг шалгарч байсан билээ.  Тэрээр энэ шагналыг хүртсэн хамгийн залуу хүн болсон юм. Өмнө нь Ромын пап лам Францис, ОХУ-ын Ерөнхийлөгч Владимир Путин,  хүний эрхийн төлөө тэмцэгч, Нобелийн энх тайвны шагналтан Мартин Лютер Кинг, Германы удирдагч Адольф Гитлер нар  энэ шагналыг хүртэж байлаа.

Эх сурвалж:BBC