Б.ДОЛЖИНЖАВ

Ганцхан улсад хамаатай мэт байсан аюул дэлхийн 218 орныг хамарч,  бидний амьдралыг орвонгоор нь эргүүлнэ чинээ санасангүй. Анх БНХАУ-ын Ухань хотод бүртгэгдсэн цар тахлаар өдгөө  70.7 сая хүн халдварлаж, 1.5 сая хүн амиа алдлаа. Агаар дуслын замаар халдварладаг энэ вирусын улмаас дэлхийн амьдралын хэв маяг санаанд оромгүйгээр өөрчлөгдөж эхлэв.

Халдварын улмаас хамгийн их алдагдалд ороод байгаа агаарын тээврийн салбарынхан үйл ажиллагаагаа сэргээж, зорчигчдыг эрсдэл багатай тээвэрлэхийн тулд олон янзын аргыг хэрэгжүүлж байна.  Тухайлбал, цар тахлын халдвараас сэргийлж, ариун цэврийн өрөө орохгүй байхын тулд зорчигчдыг нэг удаагийн памперс өмсөхийг Хятадын нисэх хүчний зохицуулагчид санал болгожээ.

Тодруулбал, Хятадын иргэний агаарын тээврийн захиргаа  онгоцонд суухдаа халдвараас сэргийлэх 49 хуудас бүхий зөвлөгөө боловсруулсан байна. Үүнд  маск, нүдний шил зүүх, нэг удаагийн бээлий, малгай, хамгаалах хувцас, гутал, памперс өмсөх гэсэн зөвлөмж  багтжээ. Гэхдээ  энэ зөвлөмж нь халдварын эрсдэл өндөртэй улс руу чартер нислэг үйлдэж байгаа тохиолдолд хамаатай аж.  Нэг сая хүн тутмын 500 нь халдвар авсан бүс нутаг руу нислэг үйлдэхэд дээрх журам үйлчилнэ. Харин нислэгийн багийнхан олон давхар хамгаалах хувцастай  учир памперс өмсөх шаардлагагүй юм байна.

Эх сурвалж:BBC