Б.ДОЛЖИНЖАВ

АНУ-ын Хүнс, эмийн захиргааны вакцины зөвлөхүүд АНУ-ын “Pfizer” болон Германы “BioNTech” компанийн хамтран туршиж байгаа “Pfizer” вакциныг яаралтайгаар ашиглах зөвшөөрөл олгох тухай өчигдөр санал хураажээ.  Тус захиргааны Вакцин ба биологийн бүтээгдэхүүний зөвлөх хорооны 22 гишүүнээс 17 гишүүн энэ саналыг зөвшөөрч, дөрвөн гишүүн татгалзаж, нэг гишүүн түдгэлзсэн байна. Ингэснээр олонхийн саналаар вакциныг яаралтай ашиглах саналыг зөвшөөрсөн юм.

Энэ талаар хорооны гишүүн, Филадельфиагийн  хүүхдийн эмнэлгийн вакцины боловсролын төвийн захирал, доктор Паул Оффит “Бүх зүйлийг мэддэг байхад хэзээ ч асуулт гардаггүй. Вакцин биднийг энэ муухай, аймшигтай зүйлээс салгах арга зам гэдгийг бид хангалттай мэдэрлээ.  Тиймээс би вакциныг үйлдвэрлэх саналыг дэмжиж “Тийм” гэж хариуллаа” гэж ярьжээ.

Гэхдээ үүний дараагаар Хүнс эмийн захиргаа, АНУ-ын Халдварт өвчнийг хянах, урьдчилан сэргийлэх төвийн зөвлөх хороо  хуралдаж вакциныг ашиглах эсэхийг шийднэ. Тэд өнөөдөр эсвэл ням гаригт хуралдаж зөвшөөрлийг хэлэлцэх юм. Хүнс эмийн захиргаа зөвшөөрөл олговол 24 цагийн дотор вакциныг тээвэрлэж эхлэх боломжтой гэжээ. Энэ тухай АНУ-ын Хүнс, эмийн захиргааны комиссар,доктор Стефен Хахн “Хүнс эмийн захиргаа энэ асуудлаар боломжоороо хурдан хуралдаж, яаралтай шийдвэр гаргах цаг үед бид ирлээ. Гэвч вакцины Америк хүмүүст үзүүлэх нөлөө, аюулгүй байдал, бүх нийтийн эрүүл мэндийг харгалзан үзэж зөвшөөрөл олгох ёстой. Америкчууд вакцинаа хүлээн авна гэсэн итгэл дүүрэн байгаа” гэж ярилаа. Мөн вакцин тариулсан Их Британий хоёр иргэнд харшил илэрсэнд санаа зовниж буйгаа хорооны зарим гишүүн хэлжээ.

Харин АНУ-ын Ерөнхийлөгч Жо Байден “Энэ вакциныг хөгжүүлсэн судлаач, эрдэмтэддээ талархаж байна. Мөн улс төрийн нөлөөнөөс ангид вакцины үр нөлөө, аюулгүй байдлыг судалж байгаа эрдэмтдэдээ талархлаа. Шударга байдал биднийг энэ амжилтад хүргэлээ” гэсэн юм. Үүнээс гадна хамгийн өндөр үр нөлөө үзүүлснээ зарласан “Moderna” вакцины зөвшөөрлийг тус улс  энэ сарын 17-нд хэлэлцэнэ.

Эх сурвалж:CNN