Т.САЙХАН

Аймаг, нийслэл, сум, дүүргийн иргэдийн Төлөөлөгчдийн Хурлын сонгуулийг шударга зохион байгуулж явуулахтай холбоотой асуудлаар ҮАБЗ-д хандан албан бичиг хүргүүлсэнтэй холбогдуулан Ардчилсан намын бүлгийн зарим гишүүд, намын удирдлагууд мэдээлэл хийлээ. 

Тэд “Сонгуулийн санал тоолох төхөөрөмж буюу “хар машин”-ыг хакердаж, хүссэн нэр дэвшигчийг ИТХ-ын төлөөлөгчөөр сонгуулж чадна. 2020 оны УИХ-ын сонгуульд  энэхүү хакер ажиллагааг туршиж, зарим нэр дэвшигчийг өндөр  санал авсан болгож чадсан. Одоо болох сонгуульд ч ялуулж  чадна хэмээн амлаж улс төрийн намуудын удирдлага болон зарим нэр дэвшигчдээс их хэмжээний мөнгө нэхсэн тухай гэмт хэргийн шинжтэй үйлдлийг Тагнуулын ерөнхий газраас шалгаж байна” гэсэн  мэдээлэл нийгмийг цочролд орууллаа” гэдгийг онцолж байв. 

УИХ-ын дэд дарга С.Одонтуяа:-  МАН-ын нэр дэвшигч Б.Сэмжидмаа, Г.Гангамөрөн нар хар машиныг хэрхэн хакердах талаарх үйлчилгээ авах талаар ярьж байгаа маш ноцтой бичлэг тарсан. Мөн хэд хэдэн дүүрэгт  мөнгө тарааж сонгогчдын саналыг худалдан авах гэж байгаа  бичлэг ч цацагдсан. Энэ нь өөрөө Төрийн эрх мэдлийг хууль бусаар авахаар завдаж байна гэсэн Үндсэн хуулийн зүйл заалттай нийцэж байна. Мөн Эрүүгийн хуульд сонгуулийг хууль бусаар явуулах, хуйвалдаан зохион байгуулах, төрийн эрх мэдлийг хууль бусаар авахыг завдах гэх мэт олон заалтуудыг зөрчсөн. 

АН-ын нийслэлийн намын хорооны даргыг түр орлон гүйцэтгэгч Б.Пүрэвдаваа: -Үүсээд буй нөхцөл байдлын талаар ҮАБЗ-д шаардлага хүргүүлж байна. Дээр дурдсан хэргийг нэн даруй илрүүлэн таслан зогсоох,цаашид дахин үйлдэгдэхээс сэргийлэх нь Монгол төрийн үүрэг, Монгол Улсын Үндэсний аюулгүй байдлын зөвлөлийн нэн тэргүүний авч хэлэлцэх асуудал гэж Ардчилсан намын зүгээс үзэн Ерөнхийлөгч Х.Баттулгад дараах шаардлагыг хүргүүлж байна. Үүнд:

1. Уг хэргийг Монгол Улсын Үндэсний аюулгүй байдлын зөвлөлийн хурлаар нэн яаралтай хэлэлцэх,
2. УИХ-ын 2020 оны 4 дүгээр сарын 16-ны өдрийн 24 тоот тогтоолоор баталсан “Аймаг, нийслэл, сум, дүүргийн Иргэдийн төлөөлөгчдийн хурлын 2020 оны ээлжит сонгуульд техник хэрэгсэл хэрэглэх тухай тогтоолд яаралтай өөрчлөлт оруулж санал тоолох дүн гаргах үйл ажиллагаанд “New Image Cast” төхөөрөмж хэрэглэхийг болиулах,
3. Үүнтэй холбоотойгоор орон нутгийн сонгуулийн саналыг гараар тоолох,
4. Саналаа өгсөн сонгогчдын хуруунд бэхэн тэмдэглэгээ заавал хийдэг болох,
5. 2020 оны 4 дүгээр сарын 16-ны өдрийн 24 тогтоолын биелэлтийг шалгах үүрэг бүхий Хянан шалгах түр хороо байгуулах. Хэрэв бидний шаардлагын хариуг ҮАБЗ яаралтай өгөхгүй бол АН гадаадын байгууллагуудад хандана гэлээ.

Эх сурвалж:www.polit.mn