Т.САЙХАН

Нийслэлийн удирдах ажилтнуудын шуурхай зөвлөгөөн өчигдөр /10.06/ болов.  Зөвлөгөөн ирцийн хувьд хангалтгүй, зарим агентлагийн дарга нар нь хуралдаа ирээгүйд  Хотын даргын үүрэг гүйцэтгэгч Ж.Батбаясгалан нэлээд бухимдав.  Тэрээр Нийслэлийн Засаг даргын Тамгын газрын дарга болон Улаанбаатар хотын Захирагчийн ажлын албаны дарга нарт хариуцлага тооцно гэдгээ мэдэгдсэн.  Мөн сонгуулийн үеэр ажлаа хаяаад алга болдог асуудал байж таарахгүй. Орон нутгийн ээлжит сонгууль болж байгаа энэ үед хуулиар хүлээсэн үүргээ биелүүлж ажиллах шаардлагатай гэж мэдэгдлээ.  Өөрөөр хэлбэл, Ж.Батбаясгалан агентлагийн дарга нараа сонгуулийн хууль зөрчиж сурталчилгаанд явж байгааг илчлэв. Ж.Батбаясгалангийн нэрлэсэн хууль зөрчсөн албан тушаалтнууд нь  Нийслэлийн хөрөнгө оруулалтын газрын дарга Л.Нарантуяа, Нийслэлийн Хот байгуулалтын асуудал хариуцсан төслүүдийн удирдагч  О.Мөнгөншагай,  Аялал жуулчлалын газрын дарга Д.Батсүх,  Архивын газрын дарга,  Нийслэлийн газрын албаны дарга А.Энхманлай,  Дотоод аудитын газрын дарга Я.Сарансүх, Нийслэлийн мэргэжлийн хяналтын газрын дарга Л.Эрдэнэчулуун, Соёл урлагийн газрын дарга Ч.Бат-Эрдэнэ, Нийслэлийн татварын газрын дарга,  Нийтийн тээврийн үйлчилгээний газрын дарга,  Худалдан авах ажиллагааны газрын дарга Э.Болормаа,   Нийслэлийн орон сууцны корпорацийн дарга ,  Хот тохижилтын газрын дарга нар хуралдаа ирээгүй байна.  Мөн 2020 оны НИТХ-д Сүхбаатар дүүрэгт нэр дэвшиж байгаа  М.Халиунбат,  Нийслэлийн Засаг даргын дэргэдэх төслүүдийн удирдагч Д.Мөнхжаргал, Д.Батбямба, Даваажаргал, Пүрэвжав нар хуралдаа ирсэнгүй, хууль зөрчин сонгуулийн ажлаа хийж яваа гэв.  Түүнчлэн Баянгол, Багануур, Налайх,  Сонгинохайрхан, Чингэлтэй, Хан-Уул дүүргийн Засаг дарга нар бүгд өрсөлдөж байгаа учраас хуралдаа ирсэнгүй гэдгийг  Ж.Батбаясгалан илчиллээ.

Эх сурвалж:www.polit.mn