Бурханы сүм Баянзүрх дүүргийн 4-р хорооны өндөр настнуудад бэлэг гардууллаа

Монгол улсад байгаль орчин цэвэрлэх хөдөлгөөн, эд барааны хандив тусламж үзүүлэх, сургалт семинар гээд төрөл бүрийн сайн дурын ажлыг зохион байгуулж ирсэн Бурханы Сүм Дэлхийн Сайн Мэдээний Авралын Зар Нийгэмлэг энэ сарын 1-ний өдөр Баянзүрх дүүргийн 4-р хорооноос зохиосон өндөр настнуудыг хүлээн авах арга хэмжээнд оролцож, ахмадуудад бэлэг гардуулан өглөө. Хүлээн авалтанд тус хорооны 150 ахмад настан оролцсон байна. Энэ өдрийн хүлээн авалт шинэ төрлийн коронавирус (COVID-19) халдварт өвчний улмаас хүнд нөхцөлд өдөр хоногийг өнгөрүүлж байсан өндөр настнуудыг урмаар тэтгэсэн сайхан арга хэмжээ боллоо. Ахмадууд ингэж нэг дор цуглана гэдэг амаргүй хэрэг. Тэд нэг нэгнийхээ амар мэндийг асууж, хөгжилтэй яриа өрнөөн, инээд хөөр болцгоож байв.

 4-р хорооны урилгаар энэ удаагийн хандивын арга хэмжээ явагдсан юм. Бүс нутаг бүрд сайн дурын ажлаараа тэргүүлж ирсэн Бурханы сүм тус хорооны хүсэлтийг хүлээн авчээ. Тэд ахмадуудад зориулсан хүлээн авалтанд 2018 онд ч мөн оролцож, ахмадуудад чихэр, жигнэмэг, шоколад бүхий амттан бэлэглэсэн байна. Сүмийн холбогдох хүн хэлэхдээ “Ковид-19” гарснаас болж өдөр хоногийг тайван бус өнгөрүүлж байсан ахмадуудад маань өнөөдрийн энэ хүлээн авалт ихээхэн урам дэм болж байгаа нь харагдаж байна. Ахмадууддаа эрүүл энхийг хүсэн ерөөе. Манай Бурханы сүм хэзээд тусалж дэмжихийн төлөө хичээх болно” хэмээн мэнд уламжиллаа.

4-р хорооны зохион байгуулагч ажилтай Жайнагүл “Манай хороо БЗД-т хүн амийн тоогоор 3-рт ордог том хороо. Өнөөдөр нийт ахмадуудаа хүлээн авах арга хэмжээг зохион байгуулж байна. Энэ арга хэмжээнд оролцож байгаа танай байгууллагатай хамтарч ажиллахдаа бид бүхэн баяртай байдаг. Олон ч жил хамтарч ажиллаа. Танай байгууллагын цаашдын ажил, үйл хэрэгт нь амжилт хүсье. Хамтарч ажиллахад  үнэхээр таатай байдаг шүү. Мөн нийт хорооныхоо хамт олны өмнөөс болон ахмадуудаа төлөөлж баярласанаа дахин илэрхийлье. ” хэмээн сэтгэгдлээ хуваалцлаа. 

Өндөр настны хүлээн авалтанд оролцсон 4-р хорооны ахмадын зөвлөлийн дарга Түмэнжаргал “Манай хороо 2000 гаруй ахмад настангуудтай. Өнөөдөр ахмадын баярыг тохиолдуулан ахмадуудаа хүлээн авч байна. Энэ баярыг зохион байгуулахад хувь нэмэрээ оруулж байгаа Бурханы сүмийнхэнд үнэхээр их баярлаж байна. Энэ баярыг тохиолдуулан нийт ахмадууддаа баярын мэнд хүргэе” гэж инээмсэглэн хэллээ.

“Ковид-19”-н нөхцөл байдал үргэлжилж байхад ч Бурханы сүмийнхэн халдварт өвчнөөс урьдчилан сэргийлэх удирдамжийг дагаж мөрдөн, халдварт өвчнөөс сэргийлэх эд зүйлээр дэмжлэг туслалцаа үзүүлэх ажилд идэвх санаачлагатай оролцсоор ирсэн. Өнгөрсөн 7-р сард хэзээ нүүр тулж ирэхийг мэдэхгүй халдварт өвчнөөс сэргийлэхийн тулд эрүүл мэндийн байгууллагаас эмч эмнэлгийн ажилчдад хэрэглэх амны хаалтны дэмжлэг туслалцаа үзүүлэх хүсэлт гаргасан. Тухайн үед Бурханы сүмийн итгэгчид даавуун амны хаалт болон нэг удаагийн амны хаалт тус бүр 5000, нийт 10000 ширхгийг Эрүүл мэндийн яаманд хандивлажээ. 8-р сард Орхон аймгийн эрүүл мэндийн төвд 4000, Дархан-Уул аймгийн эрүүл мэндийн төвд 3000 ширхэг маск тус тус хандивлажээ. Бурханы сүм хоёр сарын турш нийт 17000 ширхэг маск хандивласан нь халдварт өвчнөөс урьдчилан сэргийлэхэд томоохон тус болсон нь лавтай.

Үүнээс гадна Бурханы сүм өнгөрсөн оныг хүртэл олныг хамарсан цус хандивлах донорын арга хэмжээ зохион байгуулж, цус цусан бүтээгдэхүүний хомсдлыг арилгахад ихээхэн хувь нэмэр оруулж байжээ. Түүнчлэн байгаль орчноо хайрлан хамгаалж, орчны бохирдолтой тэмцэхийн тулд их цэвэрлэгээний аяныг тууштай явуулж иржээ. Мөн тэд мод тарьж суулгах ажилд ч анхаарал хандуулдаг байна. Тэд өвөлдөө цас цэвэрлэж, өвлийн хүйтэнтэй тэмцэн ажилладаг нийгмийн бүхий л салбарын үйл ажиллагаанд дэмжлэг үзүүлж иржээ. Тэдний энэ мэт хичээл зүтгэлийг үнэлж Эрүүл мэндийг яам, Байгаль орчны яам, Хүнс хөдөө аж ахуй хөнгөн үйлдвэрийн яам зэрэг төр засгийн байгууллагууд шагнал урамшуулал хүртээж байжээ.

Дэлхийн 175 оронд 7500 сүмтэй, бүс нутгийн эв нэгдэл, хөгжил цэцэглэлтийн төлөө зүтгэж ирсэн Бурханы сүмийн үйл ажиллагаа “Ковид-19”-н нөхцөл байдал дунд ч үргэлжилсээр. Улс орон бүрд байгаа итгэгчид нь халдварт өвчнөөс сэргийлэхэд зайлшгүй хэрэгцээт амны хаалтыг өөрсдийн гараар урлаж, уг өвчнөөс сэргийлэх зорилгоор тэргүүн шугаманд зүтгэж байгаа эмч эмнэлгийн ажилчид, бусад холбогдох албаныханд урам хайрлах аян явуулж, эдийн засгийн боломж бололцоо муутай иргэдэд хоол хүнс хандивласан байна. “Ковид-19” гарахаас өмнө ч тэд Америкт болсон хар салхи, Непалд болсон газар хөдлөлт, Перуд болсон цочир хүйтрэл, Филиппинд болсон хар салхи, Эквадорт болсон галт уулын дэлбэрэлт гээд аливаа улс оронд гай гамшиг нүүрлэхэд тэд зүгээр суулгүй, үнэгүй хоолоор үйлчлэх, аврах ажиллагаа явуулах, яаралтай тусламжийн бараа бүтээгдэхүүн хандивлах гэх мэт ажлыг идэвхтэй зохион байгуулдаг аж.

Тус сүмийн сэтгэл шингэсэн сайн дурын ажлыг Монгол төдийгүй дэлхийн олон оронд өндрөөр үнэлээд байна. АНУ-ын ерөнхийлөгчийн сайн дурын ажлын алтан шагнал (Байгууллагад олгодог тэргүүн дээд шагналыг 25 удаа) “Ногоон алим” олон улсын байгаль орчны шагналыг олон улсын төрөлд хүртэж, дэлхийн орон орны төр засгийн байгууллагаас нийт 3000 гаруй шагнал урамшуулал хүртээд байна.