Д.Болор

Хууль зүйн сайд Х.Тэмүүжин Эрүүгийн тухай хуулийн шинэ хувилбар болох Гэмт хэргийн тухай хуулийн төслийг УИХ-д өргөн бариад удаагүй байна. Хуулийн төслийг удахгүй хэлэлцэж эхлэнэ гэдгийг санаачлагч гишүүн нь онцолж байгаа юм. Тэгвэл хууль, эрх зүйн акулууд буюу МУИС-ийн Хууль зүйн сургуулийн эрдэмтэд багш нар энэ хууль нэршлээсээ эхлээд алдаа ихтэй байна гэсэн шүүмжлэлийг хэлж байгаа сурагтай. Тухайлбал, “Эрүүгийн хууль гэсэн нэр томъёо Монголын хууль зүйн судлалд их олон жилийн өмнөөс хэвшиж тогтсон. Эрүүгийн гэх энэ үг бол Монгол хэлэнд эртнээс ял зэм гэсэн утгатай явж ирсэн. Нөгөө талаас Эрүүгийн хууль нь хоёр гол асуудлыг зохицуулдаг. Нэгдүгээрт, тухайн улс оронд ямар үйлийг гэмт хэрэгт тооцох вэ. Хоёрдугаарт, гэмт хэрэг үйлдсэн этгээдэд ямар хэр хэмжээтэй ял шийтгэл ногдуулах вэ гэж. Ийм байтал Гэмт хэргийн тухай хууль гээд нэрлэчихвэл ялын тухай асуудлыг орхигдуулж байгаа юм. Тэгэхээр эрүүгийн гэдэг уламжлалт нэр томъёо нь гэмт хэрэг, ял хоёроо багтааж явсан нэр томъёо. Ер нь аливаа хууль тэр дундаа Эрүүгийн хууль нэр томъёо, үг, цэг, таслал дээр тогтдог юм. Харамсалтай нь, энэ хуулийн төсөл нь монгол хэлзүйн хэнд ч ойлгомжтой уламжлалт холбоос, нэр томъёог бүгдийг нь хасахаар оруулсан байна лээ. Энэ байдлаараа бол монгол хүн энэ төслийг уншаад юу ч ойлгохгүй. Яагаад гэхээр манай улсын бүх хуульд ба, буюу, эсхүл гэсэн холбоос үгийг хэрэглэсэн байдаг. Энэ холбоос үгүүд нь монгол хэлзүйд ойлгомжтой үг хэллэг. Гэтэл одоо эдгээр холбоос үгүүд нь хоёрдмол утгыг бий болголоо гээд Эрүүгийн хуулиас хасах өөрчлөлтийг оруулж байх шиг байн.” гэсэн хариулт өгч байв.