Д.НАМУУНЦЭЦЭГ

УИХ-ын гишүүн асан  З.Баянсэлэнгэ сонгуулийн үйл ажиллагаатай холбоотой асуудлаар байр сууриа илэрхийллээ.  Тэрээр “Өнөөдөр Монгол төрөө эмхлэх, шинээр Засгийн газраа байгуулах том үйл хэрэгт хүн бүх биечлэн оролцоосой. Маш олон иргэд дээлээ өмсөөд санлаа өгч байгаад үнэхээр бахархмаар сайхан байна.  Гэвч тэдний маань санал шударгаар тоологдоно гэдэгт эргэлзэж байна. Өчигдөр орой би мэдээлэл авсан. Сонгууль өгөхөд ганц эргэлзээтэй байдаг зүйл нь хар машин гэж иргэд ярьдаг. Өөрөөр хэлбэл, нам эвслийн ажиглагч нарын анхаарлыг хар машин дээр төвлөрүүлээд хүнийхээ үйлдлийг хянаж чаддаггүй юм байна. Хар машины дэргэд зогсож байгаа тайлбарлагч, Төрийн албан хаагч маань сонгуулийн хуулиараа дөрвөн метрээс дотогш орж болдоггүй. Гэтэл өнөөдөр зай талбайгаасаа болдог уу эвсэл зохион байгуулалтаасаа болдог уу тэр тайлбарлагч маань шууд саналын хар хайрцагны  дэргэд зогсоод иргэдийн саналыг ажиглаж байдаг. Тэгээд хэсгийн хорооныхоо даргад мэдээллээ өгдөг. Иргэдийн санал аль намд давуу байдал үүсгэж байна гэдгийг харж байгаад дарга нартаа мэдээлэл өгдөг. Энэ тайлбарлагч хийж байгаа төрийн албан хаагчид бүгд МАН-ынх.  Бусад албан хаагч нар ч тэднээс хараат ажиллаж чаддаггүй. Ажилгүй болно гэж айдаг. Тэгээд за одоо МАН ялагдах гээд ирж байна шүү гэдэг мэдээллийг хэсгийн даргадаа өгдөг. Нөгөө санал нь эвгүйтээд ирэхээр иргэдэд мөнгө тарааж эхэлдэг. Одоо Сонгинохайрхан дүүрэгт нэг хүний санал 50 мянган төгрөг болчихсон байна. Тэгээд аль жилийн өмнө энэ өгөх сүлжээгээ бэлддэг. Тэгээд эдгээр хүмүүсээ 17.00  цагаас эхэлж оруулдаг. Сонгууль дуусахаас өмнөхөн нэг дор маш их хүмүүсийг оруулдаг. Тэр тэнцүү явж байгаа санал дээр нэмдэг, ялагдаж байгаа санал дээр нэмж саналыг их болгодог.  Нэг хэсгийн хороон дээр дөрвөөс дээш машин явуулахгүй гэж хуульчилсан байхад МАН-ын 50 машин байна. Иргэд маань дээлээ өмсөөд шударга сонгууль болно гэж итгэж байхад ийм зүйл болж байгаад нь харамсаж байна. Алслагдсан Сонгинохайрхан дүүрэгт ийм байгаа тул Баянзүрх дүүрэгт ч мөн ялгаагүй байгаа байх . 15.00 цаг хүртэл цэвэр ,шударга иргэд саналаа өгдөг. 17.00-н цагаас хойшоо саналаа өгөх нь тэгээд хэцүү болж байгаа. Мөн хурууны хээгээр санал өгч болохгүй байна гэдэг чинь үнэхээр аюултай нөхцөл байдал. Иргэний үнэмлэхийг хэн ч олон хуулбарлаад олон саналд өгөх боломжтой. Одоо бид саналаа шударга өгөхгүй бол дахиад дөрвөн жилийн дараа яг л энэ байдлаараа байна. Хариуцлагатай байцгаая” гэлээ.

Эх сурвалж:www.polit.mn