Л.НОМИН

Орхон аймаг 66700 сонгогчтой. Тэднээс 373 сонгогч зөөврийн санал хайрцгаар саналаа өгч байгаа юм байна. Тэдгээр сонгогчоос санал авах ажил өчигдөр /2020.6.23./ өглөөний 9:00цагаас эхэлжээ. Зөөврийн хайрцгаар авах саналыг СЕХ, УБЕГ-ын гээд 3-4 хүний бүрэлдэхүүнтэй явж авдаг байна.

Энэ явцад саналд нь нөлөөлөх гэж оролдсон явдал гарчээ. Тухайлбал Орхон аймгийн Цагаанчулуут багийн 80 настай буурайг гэртээ ганцаараа байхад нь өчигдөр өглөө 9:00 цаг өнгөрч байхад багийн Засаг дарга нь очжээ. Засаг дарга “Та Ардын намын гурван нэр дэвшигчийг дэмжээрэй” гэсэн байна.

Мөн удалгүй Тэмүүлэн гэдэг 30 орчим насны залуу очиж сонгуулийн саналын хуудсан дээр МАН-аас нэр дэвшиж байгаа гурван нэр дэвшигчийн нэрийг бичиж “Энэ гурван хүнийг дугуйлаарай” гэжээ. Тэр байтугай 80 настай эмээгийн өмнөөс саналын хуудсыг бөглөөд зөөврийн хайрцганд хийхэд бэлэн болгоод санал авах хүмүүсийг хүлээж байжээ. Энэ нь ил болж Орхон аймгийн Сонгуулийн хорооноос хүчингүй болгож, саналыг дахин авсан байна.

Эндээс харахад зөөврийн хайрцгаар саналаа өгч байгаа 373 хүний саналд нөлөөлөл орох өндөр магадлалтай. Мөн энэ ажилд орон нутгийн засаг захиргааны албан тушаалтнууд оролцож байгаа нь Орхон аймгийн Засаг дарга Д.Батлутын хийж буй ажил гэж үзэхэд хүргэж байна.

Өөрөөр хэлбэл, Орхон аймагт зөөврийн хайрцгаар санал өгч байгаа 373 сонгогч саналаа дарамт, шахалт, нөлөөлөлгүйгээр өгсөн эсэхийг шалгах хэрэгтэй юм.

Орхон аймагт МАН-аас ХЗДХ-ийн сайд Ц.Нямдорж, Орхон аймгийн Засаг дарга Д.Батлут, МЭХ-ны ерөнхийлөгч Б.Оюунгэрэл нэр дэвшсэн байна.

https://www.youtube.com/watch?v=9D8VLLxErso&feature=youtu.be&fbclid=IwAR2OyY2sn0uONOVZQoO3el11xMilf12PSWipOuujFTDlSea58DdpZDYLQXM 

Эх сурвалж:www.polit.mn