Д.Болор

Төрийн тусгай албан хаагчдын нэгдсэн эмнэлгийг татан буулгаж Цэргийн госпитальтай нэгтгэн Батлан хамгаалах хууль сахиулах албан хаагчдын нэгдсэн эмнэлэг болгон өөрчилсөн билээ. Хуучин цагт Төрийн тусгай албан хаагчдын нэгдсэн эмнэлгээр цагдаа, тагнуул, онцгой байдал, хилийн цэрэг, гаалийн ажилтнууд үйлчлүүлдэг. Харин цэргийн госпитальд Батлан хамгаалах яамны харъяа агентлагийн албан хаагчид хэвтэж эмчлүүлдэг байсан юм. Шинэчлэлийн Засгийн газраас энэхүү хоёр чиглэлийн эмнэлгийг нэгтгэсэн нь багагүй хэл ам гарахад хүргэсэн. Нэгдүгээрт,  Төрийн тусгай албан хаагчдын нэгдсэн эмнэлгийнхэн өөрийн статусаа хадгалахыг хүссэн. Хоёрдугаарт, олон жилийн туршид хөөцөлдөж байж улсын төсвөөс мөнгө гаргуулан барьж буй шинэхэн байраа Хууль зүйн яаманд алдахад хүргэсэн нь эсэргүүцлийн гол шалтгаан болж байв. Гэвч Засгийн газрын  122 тогтоолоор эмнэлгийн шинэхэн байрыг Хууль зүйн яам, Улсын ерөнхий прокурорын газрын албан контор болгохоор шийдсэн. Хачирхалтай хэсэг хугацааны дараа Хууль зүйн сайд Х.Тэмүүжиний хүсэлтээр энэ тогтоолыг өөрчлөх шийдвэр гарсан байлаа.  Учир нь Засгийн газраас дээрх 122 дугаар тогтоолоо өөрчилж эмнэлгийн байранд Хууль зүйн яам болоод ЦЕГ-ын мөрдөн байцаах асуудал эрхэлсэн байгууллагын албан контор, шүүх эрх мэдэл, хууль сахиулах байгууллагын нэгдсэн цахим мэдээллийн оффис байрлах ёстой гэж шийдэж. Улсын ерөнхий прокурорын газрыг байрлуулахаас татгалзсан гэсэн үг. Энэ шийдвэр мэдээж Улсын ерөнхий прокурор Д.Дорлигжавын дургүйцлийг хүргэж улмаар Засгийн газрыг шүүхэд өгөх шалтгаан болсон. Д.Дорлигжав нэхэмжлэлдээ “Нэгдүгээрт, Улсын ерөнхий прокурорын газрыг байрлуулах шийдвэрийг цуцалсан нь буруу. Хоёрдугаарт, цуцлахдаа Төрийн өмчийн хорооноос зөвшөөрөл аваагүй байна. Гуравдугаарт, ямар ч судалгаа шинжилгээ хийлгүйгээр манай оффис байрлахыг нь хасч мөрдөн байцаах байгууллагаа байрлуулахыг хүсчээ” гэх өргөдлийг шүүхэд өгсөн байдаг. Тэгвэл маргаан явсаар өнгөрсөн сарын 24-нд Улсын дээд шүүхээр эцэслэн шийдсэн байна. Ингэхдээ Засгийн газрын хамгийн сүүлд гаргасан тогтоол нь процессийн алдаатай байна гэсэн шийдвэр гаргажээ. Үүнд маргалдагч талууд өөр, өөр байр суурьтай байна. Тухайлбал, Хууль зүйн яамныхан “Засгийн газрын тогтоол процессийн алдаатай байна гэж шүүх үзсэн. Энэ нь УЕПГ-ынхан ялсан гэсэн үг биш” гэсэн тайлбар өгөх бол прокурорууд “УЕПГ-ыг эмнэлгийн байранд байрлуулахаас хассан нь буруу гэх шийдвэр гэж шүүх дүгнэлээ” гэсэн хариулт өгч байна.