Д.БОЛОР

УИХ-ын нэгдсэн чуулганаар өчигдөр Хилийн боомтын тухай хуулийн төсөл хэлэлцэх байсан ч эргүүлэн буцаалаа. Шалтгаан нь  төсөлд хилийн 24 боомтыг нэгдсэн захиргаатай болгохоор тусгасан ч орон тоо, төсвийн талаар тодорхой мэдээлэл байхгүй гэж. Орон тоо, төсвийн талаарх мэдээллийг нь нэг мөр болгосныхоо дараа нэгдсэн чуулганаар хэлэлцэх нь зөв гэдэгт олонхи гишүүн санал нэгдсэн юм. Харин төслийн талаар УИХ-ын гишүүн М.Батчимэгээс зарим асуултад хариулт авлаа.

-Хилийн боомтын тухай хууль батлагдсанаар өдгөө хил, гааль дээр ажиллаж байгаа төрийн байгууллагуудын зохион байгуулалтад ямар өөрчлөлт орох юм бэ?

-Хилийн боомтын тухай шинэ хууль батлагдсанаар хил дээр ажиллаж байгаа гааль, мэргэжлийн хяналт болон аюулгүй байдлыг хангах байгууллагууд нь мэргэжлийн ажлаа хийнэ. Бүтэц зохион байгуулалтад төдийлөн өөрчлөлт орохгүй. Ер нь боомтын нэгдсэн захиргаа байхгүйгээс болоод хил, гааль дээр ажиллаж байгаа байгууллагууд өөрсдөө  байшингаа барьж, галч үйлчлэгчээ өөрсдөө олж  ажиллуулна. Боомтын нэгдсэн аж ахуйн нэгж байхгүй учраас боомт хөг­жихгүй байгаа шалтгаан ерөөсөө энэ. Урд хилийн Эрээний боомт яаж хөгжиж байгааг та бүхэн мэднэ. Тэд чинь тодорхой бүтэцтэй, төвөөсөө нэгдсэн бод­логоор хөгжүүлдэг, хариуцсан захиргаатай уч­раас хөгжөөд байгаа юм. 

-Бүтэц, зохион байгуулалтын хувьд хил дээр байгаа байгууллагуудад ямар ч өөрчлөлт орохгүй гэсэн үг үү?

-Үйл ажиллагаанд нь ямар ч өөрчлөлт орохгүй. Бүтэц зохион байгуулалтын хувьд ч гэсэн тэр. Гагцхүү тэдний  үйлчилгээний ажилтнууд боомтын захиргаандаа шилжинэ.

-Орон тоо хэд байхаар тусгаж байгаа юм бэ. Нүсэр бүтэц үүсэх юм биш биз?

-Засгийн газрын хэрэг эрхлэх газрынхан тооцоо судалгаа гаргаж өгөхгүй байгаагаас бо­лоод боомтын хууль бат­лагдахгүй байна. Зөвхөн гаалийн байгууллага гэхэд аж ахуйн ажил эрхэлдэг 180 хүн боомт руу шилжинэ. Бусад байгууллагаас ч гэсэн шилжих үндэстэй.  Энэ л тооцоо Засгийн газрын хэрэг эрхлэх газраас гарч ирэхгүй байна.