Төрийн ордны ойролцоо буун дуу гарч, яам, агентлагийн гадаа тэсрэх бөмбөг тавьсан гэсэн мэдээлэл өчигдөржин олныг цочоож тайван байлгасангүй. Үйл явдал ингэсхийгээд өрнөж, азаар хүний амь эрсдээгүй ч айлгасныхаа төлөө хэн ч биднээс уучлалт гуйсангүй. Тэгэхээр айлгасан эзэн нь хэн юм бэ. Буу, тэсрэх бөмбөг тавьж жагссан хүмүүс үү. Тэд бол газар шороо, байгалийн баялгаа хамгаалах зорилготой хөдөлгөөнийхөн гэсэн. Мөн галт зэвсэг нээх зорилгогүй, УИХ-ын ээлжит бус чуулганы нээлтийн үеэр эрхэм түшээдэд сануулга, анхааруулга өгөхөөр Төрийн ордны гадаа жагссан тухайгаа тайлбарлажээ.

Ээлжит бус чуулганаар урт нэртэй буюу Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай хуулийг дагаж мөрдөх журмын тухай хуульд нэмэлт, өөрчлөлт оруулах тухай хуулийн төслийг хэлэлцэх юм. Энэ хууль байгаль хамгаалах зорилготой төрийн бус байгууллагуудын анхаарлын төвд байдаг. Хуулийг өөрчлөхийг тэд эсэргүүцэж ийн Төрийн ордны гадаа жагсчээ. Мөн хуулийг анх санаачилсан “автор”-ууд болох УИХ-ын зарим гишүүн ч эсэргүүцэж буй гэх. Ээлжит бус чуулган эхлэхээсээ өмнө ч олны анхаарлын төвд байсан. Одоогийн мөрдөж байгаа хуулийн зүйл заалтуудыг нэлээд сулруулсан, гадаад, дотоодын хөрөнгө оруулагчдад таатай орчин бүрдүүлэх нэрээр татварын хөнгөлөлт зэргийг ээлжит бус чуулганаар хэлэлцэх төслүүдэд тусгасан гэж байгаа юм. Энэ нь олон нийт болон, байгаль хамгаалах хөдөлгөөнийхний эсэргүүцэлтэй тулаад байгаа юм. Ийнхүү ээлжит бус чуулган олны хэл ам, анхаарлын төвд 14 хоног хуралдах болж байна. Төрийн ордны гадна, дотно болсон үйл явцын талаар олон нийт янз бүрийн бодолтой байв. Нэг хэсэг нь галт зэвсэг барьсан байгаль хамгаалах хөдөлгөөнийхнийг буруутгасан бол зарим нь ээлжит бус чуулганаас өөр зүйлд олны анхаарлыг татах гэсэн захиалгат үйлдэл гэж үзэж байв.  Мөн УИХ дахь МАН-ын бүлгийнхэн эдийн засаг ийм хүнд байгаа үед үүнээс гарах арга замын талаар хэлэлцэхийн оронд байгаль орчин, уул уурхайтай холбоотой төслүүд хэлэлцэх гэж байгааг буруутгаж байв.