Т.САЙХАН  УИХ-ын ээлжит бус чуулганы  хуралдаан өчигдөр 10.00 цагт эхэллээ. Хуралдаанаар Тендерийн хууль, Татварын багц хууль, Ашигт малтмалын тухай хуулийн өөрчлөлтийг хэлэлцүүллээ.

Тендерийг зохицуулах агентлагтай болно

Тендерийн хууль нь төрөөс зарлаж байгаа тендерийн үйл явц болон тусгайлан агентлаг байгуулах зэргийг зохицуулж байгаа юм.  Мөн Засгийн газраас өргөн барьсан хоёр хуулийг нэгтгэж байгаагаараа онцлог юм. Хуулийн төсөлтэй холбогдуулан УИХ-ын гишүүд асуулт, тодруулга авсан.  

УИХ-ын гишүүн Ж.Ганбаатар:

-Энэ хуулийн талаар гишүүд ямар ч мэдээлэлгүй байна. Энэ хуульд доод үнийн санал гэж байгаа юу. Хэрэв байгаа бол Жижиг дунд үйлдвэр эрхлэгч тендерт орохоор бол үнийн дүнгийн 10 хувийг өөрчлөх үү.  

Ажлын хэсэг:

-Хууль өөрчлөх болсон эхний шалтгаан бол дотоод худалдан авалтыг нэмэгдүүлэхийн тулд өөрчлөлт оруулж байгаа. Энэ чиглэлээр хэд хэдэн нэмэлт, өөрчлөлт орж байгаа учраас 10 хувийг 15 хувь болгох шаардлагагүй гэж үзсэн.  

УИХ-ын гишүүн С.Эрдэнэ:

-Тендерийн будлиан, маргаантай асуудлаас болж улсын хөрөнгө оруулалтын ажил маш их тасалдаж байна. Маш олон сургууль, цэцэрлэг, эмнэлэг, нэн шаардлагатай хөрөнгө оруулалтуудыг УИХ баталдаг ч гүйцэтгэл нь маш муу байдаг. Энэ нь тендер шалгаруулж байгаа тухайн албан тушаалтан буруутай. Түүнээс гадна улирлын чанартай улс учраас тендерийн маргаан үүссэнээс эхлээд л зарим ажил цас орохтой зэрэгцэн эхэлдэг. Ер нь тендерийн үйл ажиллагаанд хугацаа зааж өгвөл ямар вэ. Хуулийн хугацаа тогтоож өгвөл яасан юм бэ. Одоо тендер нь зарлагдаагүй байгаа хөрөнгө оруулалт хэзээ эхлэх вэ.  

УИХ-ын гишүүн, ажлын хэсгийн ахлагч Д.Оюунхорол:

-Засгийн газраас өргөн барьсан хуульд энэ асуудлыг тусгаагүй байгаа. Гэхдээ хэлэлцүүлэг болон ажлын хэсгийн явцад энэ асуудал маш их хөндөгдсөн. Ер нь энэ мэт маш олон асуудал үлдсэн байгаа.  Ийнхүү чуулганаар Тендерийн хуулийг хэлэлцээд эцсийн хэлэлцүүлэг шилжүүллээ.  

Алтны татварыг 2,5 хувь болгох эсэхийг дахин ярилцахаар болов

Үүний дараа чуулганаар Татварын багц хуулийг хэлэлцэх байсан ч тус хуулийн зарим заалт Үндсэн хууль зөрчсөн байж болзошгүй гэсэн үндэслэлээр Ардчилсан намын бүлэг завсарлага авав. УИХ-ын даргын зүгээс Ардчилсан намын бүлэгт завсарлага өгч, Төсвийн байнгын хороог хуралдуулахаар боллоо. Үргэлжлүүлэн Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийг хэлэлцлээ.  Тус хуульд орж буй нэг гол өөрчлөлт нь алтны татварыг 2,5 хувь байхаар тусгасан ч гишүүдийн зүгээс эсэргүүцэл дагуулсан.  

УИХ-ын гишүүн Г.Тэмүүлэн:

- Өнгөрсөн таван жил татварыг 2,5 хувь болгож бууруулж байсан бөгөөд өмнөх үндэслэл нь хэвээр байна. Зохицуулалт байхгүй учраас хулгайгаар алт гараад байна гэдэг ойлголтыг л өгөөд байх шиг. Тэгэхээр төр ер нь алт хил давуулж, татвараас бултаж байгаа хүмүүст ялагдаад байгаа юм шиг харагдаад байгаа юм. Ер нь алтанд тавих хяналтыг хэрхэн сайжруулах вэ, хууль бус хил давуулах, татвараас зугатаах зэрэг асуудлыг хэзээнээс яаж хийх вэ.  

Уул уурхай, хүнд үйлдвэрийн сайд Д.Сумъяабазар:

-Зарчмын хувьд тантай санал нэг байна. Үндсэн хуулийнхаа суурь зарчмыг баримталж, зохицуулалт хийх ёстой. Тиймээс эрх зүйн шинэтгэл, хил гаалийн хяналтыг сайжруулах яамд хоорондын үйл ажиллагааг уялдуулж, Засгийн газар, УИХ-ын бүрэн дэмжлэгтэй хийх хэрэгтэй юм билээ. 2,5 хувийн алтны татвар бол өндөр татвар биш. Дан борлуулалтын татвараас гадна маш олон татвар авдаг. Эх сурвалж: “Зууны мэдээ” сонин 2019.3.21 № 59 (6026)