Ч.Зотол Ардчиллын удирдагч, төр, нийгмийн нэрт зүтгэлтэн С.Зоригийн амийг хөнөөх захиалга өгсөн хүмүүсийг илрүүлэх чиг үүрэгтэйгээр байгуулагдсан ТЕГ-ын Мөрдөн байцаах хэлтэс, ЦЕГ-ын Мөрдөн байцаах газрын Онц хүнд гэмт хэрэг мөрдөх хэлтсийн мөрдөн байцаагчдын бүрэлдэхүүнтэй Хамтарсан ажлын хэсгийн бүрэлдэхүүнд өөрчлөлт оруулах ажил саяхнаас хийгдэж эхэлжээ. Уг ажил нь Хууль зүй, дотоод хэргийн сайд Ц.Нямдоржийн өгсөн үүрэг даалгаврын дагуу хэрэгжиж байгаа гэсэн мэдээлэл байна. “Сайдын шууд удирдлага дор ажилладаг ЦЕГ-ын дарга С.Баатаржав генерал захиалагчийг илрүүлэх чиг үүрэгтэй хамтарсан ажлын хэсгийн бүрэлдэхүүнд ЦЕГ-ыг төлөөлөн ажиллаж буй мөрдөгчдөд гурав хоногийн өмнөөс хүчтэй шахалт үзүүлж эхэлсэн”гэдгийг эх сурвалж хэллээ. Тухайлбал, 2014 оноос өнөөдрийг хүртэлх хугацаанд С.Зоригийн амь насыг хөнөөсөн хэргийг илрүүлэх ажлын хэсгийн бүрэлдэхүүнд багтаж, гүйцэтгэгч нар болох Б.Содномдаржаа, Т.Чимгээ, Ц.Амгаланбаатар нарыг илрүүлэхэд оролцсон мөрдөгч н.Баттөмөрийг шалтгаангүйгээр үүрэгт ажлаа өгч ажлын хэсгээс гарахыг шаардаж байгаа гэнэ. С.Зориг агсны амь насыг хөнөөсөн онц ноцтой гэмт хэргийн захиалагчийг илрүүлэх ажилд Хууль зүйн, дотоод хэргийн сайд Ц.Нямдорж болон нэр бүхий УИХ-ын гишүүд хөндлөнгөөс оролцож, мөрдөн байцаагчдын 20 жилийн ажлын үр дүнг үндэслэлгүйгээр үгүйсгэж байдаг тухай хэвлэл мэдээллээр олонтой гарсан. Тэр ч бүү хэл хэргийн газарт үлдсэн цорын ганц гэрч гэгддэг Б.Булганыг сэжигтэн бус захиалагчдын талд ажилласан, яллагдагчаар татчихаад байхад илтэд өмөөрсөн, хэрэгт холбогдолгүй хэмээн тэрээр олон нийтийн санаа бодолд нөлөөлж байсан удаатай. Одоогоос нэг жилийн өмнө ТЕГ-ын дарга асан Б.Хурц “Ц.Нямдорж Хууль зүйн сайд болох бүртээ С.Зоригийн хэргийг шалгах ажлын хэсгийг дөрвөн удаа тарааж, 32 албан хаагчийн чиг үүргийг өөрчилсөн. С.Зоригийн амь насыг хөнөөсөн хэргийн захиалагчийг илрүүлэх ажилд Ц.Нямдорж улс төрийн болон бусад зорилгоор нөлөөлж байна” хэмээн мэдэгдэж байсан юм. Үүнээс үзсэн ч, одоо өрнөж байгаа үйл явдлаас харсан ч Ц.Нямдорж Хууль зүйн сайдаар томилогдох бүртээ ажлын хэсгийнхнийг онцгойлон анхаарч өөрчлөлт оруулдаг нь улс төрийн аллагын захиалагчдийг илрүүлэх ажилд ямар нэгэн шалтгаанаар саад хийж нэгэнт “илрээд” байгаа хэрэгтнүүдийг ял завших боломжийг бүрдүүлж байгаа гэх хардлагыг төрүүлж байна. Тиймдээ ч ажлын хэсэгт ажиллаж байгаа албан хаагчдыг шинэ бүрэлдэхүүнээр сольсноор мөрдөн шалгах ажиллагаа удааширч шоу болоод өнгөрөх магадлал өндөр байна. Эх сурвалж:www.polit.mn