Т.САЙХАН Нийслэлийн газрын албанаас “Туушин” зочид буудалд газар чөлөөлөх албан бичгийг долоо хоногийн өмнө хүргүүлсэн.  Тэгвэл өнөөдөр албадан буулгах үйл ажиллагааг явуулаад байна.  Өглөөний 08.00 цагийн үед эхэлж, явган хүний  зам таглан барьсан хэсгийг албадан буулгалаа.  Энэ талаар “Туушин” зочид буудлын “Туушин” компаний дэд захирал Ж.Туяа “Бид албан бичгийн хариуг өчигдөр /10.15/ явуулсан.  Газар чөлөөлөх судалгааг хийж, зураг төслөө боловсруулж байгаа талаар хэлсэн.  Гэтэл өнөө өглөөнөөс эхлэн ийм  үйл ажиллагаа явуулж байна.  Хүний хувийн өмчид ингэж хандаж болохгүй. Манайх АНУ-ын сүлжээ зочид буудлын стандартыг Монголдоо анх удаа нэвтрүүлсэн. 300 гаруй ханган нийлүүлэгчтэй. 3000 гаруй бүтээгдэхүүн худалдан авч байна. Нийгмийн хариуцлагаа биелүүлдэг компани.” гэсэн.  Харин Нийслэлийн Газрын албаны мэргэжилтэн Б.Шижир “Нийслэлийн Засаг даргын 2015 оны захирамжаар Сүхбаатар дүүргийн наймдугаар хорооны нутаг дэвсгэрт байрлах 1400 метр квадрат газрыг Туушин компанид контор, үйлчилгээний зориулалтаар эзэмшүүлэхээр гэрчилгээ олгосон байна. Гэтэл газар эзэмшүүлэх гэрээг зөрчин эзэмшилд олгогдсон газрын хэмжээг дур мэдэн нэмэгдүүлж, зохих зөвшөөрөлгүйгээр нийтийн эзэмшлийн зам, талбайд шат, автомашины орц гарц хийснээр явган хүний зам хаасан. Тиймээс Газрын тухай хуулийн 57.4-т заасны дагуу албадан чөлөөлөх арга хэмжээ авч байна” гэлээ.  Мөн Нийслэлийн газрын албанаас албан чөлөөлөх үйл ажиллагааг дахин хэд хэдэн газарт явуулахаар төлөвлөжээ. Эх сурвалж:www.polit.mn