Монголын эмэгтэйчүүдийн холбооны нэгдсэн V чуулган болж шинэ ерөнхийлөгчийг сонголоо. МЭХ-ны ерөнхийлөгчид Ж.Эрдэнэчимэг, Б.Оюунгэрэл, Н.Золзаяа, Д.Энхжаргал нар өрсөлдөхөөр хүсэлтээ ирүүлсэн ч  Н.Золзаяа, Д.Энхжаргал нар нэрээ татаж, Ж.Эрдэнэчимэг, Б.Оюунгэрэл нар өрсөлдсөн байна. Нийт 143 төлөөлөгч саналаа өгснөөс Б.Оюунгэрэл 82 , Ж.Эрдэнэчимэг 61 гишүүний санал авчээ. 94 жилийн түүхтэй Монголын эмэгтэйчүүдийн холбооны шинэ ерөнхийлөгчөөр сонгогдсон Б.Оюунгэрэл нь chuhal.mn сайтын ерөнхий захирал бөгөөд Монголын сонины холбооны гүйцэтгэх захирал, Мэдээллийн Сайтуудын Ассоциацийн тэргүүнээр ажиллаж байжээ. Тэрээр холбоог олон нийтэд нээлттэй болгохоос гадна, эмэгтэйчүүдийн эсрэг гэмт хэрэг хүчирхийлэлтэй тэмцэх үйлсээр ажлаа эхлүүлнэ гэдгээ мэдэгджээ. Чуулганд есөн дүүрэг, 21 аймаг, 300 гаруй сумын төлөөлөл 3000 эмэгтэй оролцсон бөгөөд энэ удаагийн хуралдаанаар дүрмийн шинэчлэлээ хийсэн нь чуулганы томоохон ололт байлаа гэдгийг чуулганд оролцсон төлөөлөгчид онцоллоо. Эх сурвалж: “Зууны мэдээ” сонин