Ц.БАЯР Олон улсын ахмадын баярын өдрийг тохиолдуулан Хөвсгөл аймагт ахмад настнуудад зориулсан тэмцээн уралдаан, урлагийн тоглолт, үндэсний үйлдвэрлэлээ дэмжсэн үзэсгэлэн яармаг зохион байгуулсанд тус аймгийн  ахмадууд сэтгэл  өндөр байна. Жил бүр өргөн дэлгэр тэмдэглэдэг ахмадын баярыг угтаж аймгийн ахмадын хорооноос харьяалалгүй ахмадуудыг төрийн болон төрийн бус байгууллагуудад хамааруулж ахмадуудаа баярын үйл ажиллагаанд өргөнөөр оролцуулахыг зорьсон байна. Мөн тус аймаг энэ оныг “Ахмад настнаа дээдлэх жил” болгон зарлаж ахмадуудын дунд урлаг спортын наадам зохион байгуулж, ахмадууддаа эрүүл мэндийн үйлчилгээг хүргэж үзлэг оношлогоонд хамруулах, сум бүрт ахмадын  төв байгуулах зэрэг олон бүтээлч ажлыг өрнүүлжээ. Энэ сарын 1-ний өдөр тус аймгийн удирдлагууд бөхийн өргөөндөө “Ахмадын баяр”-т зориулсан өргөтгөсөн арга хэмжээг зохион байгуулж,  азай буурлууддаа урлагийн тоглолт сонирхуулав. Мөн аймаг орон нутагтаа олон жил үр бүтээлтэй ажиллаж байгаад гавъяаныхаа амралтанд суугаа ахмадуудад  төрийн дээд одон медаль хүртээсэн юм. Энэ үеэр ИТХ-ындарга Л.Төмөрбаатар ахмадууддаа баяр  хүргэж үг хэлэхдээ “ Ахмадын жилийн ажлын хүрээнд  настануудаа дэмжсэн шийдвэр, бодлогын баримт бичиг, хөрөнгө оруулалтын асуудлыг шийдвэрлэлээ.Цаашид ч ахмад настнуудын нийгмийн оролцоонд анхаарч хөдөлмөр эрхлүүлэх бодлогыг дэвшүүлж байна” гэсэн юм. Ахмадын баярт зориулсан тоглолтод ахмад настны  хийн дасгалын үзүүлбэр, таягтай ахмадуудын уралдаан, шатар болон  ахмадын гар бөмбөгийн тэмцээн, үзэсгэлэн худалдааг зохион байгуулсан юм. Байгууллагууд ахмадууддаа зориулж үйлдвэрийн хямд үнээр бүтээгдэхүүнээ борлуулж, хүн бүрт нутгийн брэнд гарын бэлэг гардуулсанд  ахмадууд сэтгэл өндөр байв.  Хөвсгөл аймагт одоогоор 11200 гаруй ахмад настан амьдардаг аж. Ахмадын баярын хүндэтгэлийн арга хэмжээний үеэр УИХ-ын гишүүн Л.Энх-Амгалан, Л.Мөнхбаатар нар бүх ахмууддаа мэндчилгээ дэвшүүлж  гарын бэлгээ ирүүлсэнг ахмуудад гардуулан өгсөн юм. УИХ-ын гишүүн Мөнхбаатар аймаг, сумын ахмадын хороонд тус бүр 500 мянган төгрөг хандивласан юм. Эх сурвалж:www.polim.mn