Д.ОЮУНЧИМЭГ “Олон улсын ахмадын баяр”-ын өдрийг тохиолдуулан МҮОНРТ-ийнхэн үе үеийн ахмадууддаа хүндэтгэл үзүүллээ. Уулзалтад 300 гаруй ахмад ажилтан, албан хаагч оролцсон юм. Уулзалтыг нээж МҮОНРТ-ийн захирал Л.Нинжжамц “Манай байгууллагын үүсч, хөгжсөн түүх та бүхэнтэй минь салшгүй холбоотой. Залгамж халаа болсон залуучууд маань та нарынхаа бүтээсэн, үлдээж өгсөн санаа, санаачлагыг үргэлжлүүлэн авч яваадаа баяртай байгаагаа уламжилъя. Өдгөө телевизийн гурван суваг болон радиогийн нэвтрүүлгийг дүрсээр харуулах боломжийг бүрдүүлэн ажиллаж байгааг дуулгахад таатай байна” гэсэн юм. 50 гаруй жилийн түүхтэй телевизийн нэг эд эс болж ажилласан он жилүүдийг мартах учиргүй. Бидний хийж бүтээснийг үргэлжлүүлэн нэр төртэй авч яваа сэтгүүлч, зураглаач, найруулагч гэсэн ажилтан, албан хаагчиддаа баярын мэнд хүргэе хэмээн ахмад настан Д.Ичинхорлоо ярьсан юм. Уулзалтад цугларсан ахмадууд цаашид улам хөгжиж, дэвжих, олон нийтийг соён гэгээрүүлэх их үйлсэд чин сэтгэлээ зориулан зүтгэх хүндтэй үүргийг залуу үе маань хүлээж байгаа. Тиймээс мэдээлэл түгээх их үйлсэд нь амжилт хүсье гэж байв. Мөн ахмадууд өөрсдийн туршлагаасаа харамгүй хуваалцаж, зөвлөж, туслахад бэлэн гэдгээ энэ үеэр хэлж байлаа. МҮОНРТ-ийн удирдлагууд хүндэтгэл үзүүлсэнд ахмадууд сэтгэл өндөр байгаагаа хэлж, залуу үедээ итгэл найдвар хүлээлгэн, зорилготой, зоримог байж, улс эх орныхоо төлөө ихийг хийж бүтээхийг захьсан юм. Эх сурвалж www.polit.mn