Т.САЙХАН УИХ дахь МАН-ын бүлгийн өнөөдрийн /10.01/ хуралдаанаар гурван асуудал хэлэлцжээ.  Хурлын дараа МАН-ын бүлгийн дарга Д.Хаянхярваа " Төсөв өргөн барьсантай холбогдуулан ажлын хэсэг байгуулав. 2019 оны төсөв гэдэг бол нэлээн хариуцлагатай төсөв. Үндсэндээ Засгийн газрын үйл ажиллагааны хөтөлбөрийг шийдвэрлэх он бол 2019 он. Тиймээс нухацтай ажиллах ёстой гэж үзэн УИХ-ын гишүүн Д.Оюунхоролоор ахлуулсан 11 хүний бүрэлдэхүүнтэй ажлын хэсэг байгууллаа” гэв.    Мөн хуралдаанаар  Үндсэн хуулийн цэцийн дүгнэлтийн буюу Хэнтий аймгийн 42 дугаар тойргийн асуудлыг ярьжээ.  УИХ-аас гаргасан шийдвэрийг Үндсэн хуулийн цэц зөрчсөн гэж үзэхгүй байгаа. Тиймээс цэцийн дүгнэлтийг хүлээн авах боломжгүй гэдэгт бүлгийн гишүүд санал нэгдэж, улстөрийн шийдвэр гаргажээ.  Үүний дараа  бүлгийн гишүүд тойрогтоо ажилласан. Тойрогтоо ажиллахад ард иргэдийн амьдрал ахуй ямар байна. Ард түмэн юу хүсч байна. Ямар зүйлийг төр засгаас шаардаж байна гэдгийг ярилцахаар боллоо. Төсөвт ямар боломж байна. Боломж байвал асуудлыг шийдье гэх шийдэлд хүрсэн. Эцэст нь Ерөнхий сайд У.Хүрэлсүх ЗТХ-ийн сайдыг энэ долоо хоногтоо багтааж чөлөөлж, орны хүнийг нь томилох асуудлыг хэлэлцэнэ гэдгээ танилцуулсан" гэлээ. Ингээд сэтгүүлчдийн сонирхсон асуултад хариуллаа.  -ЗТХ-ийн сайдаар ямар хүн томилох вэ. Гаднаас томилох уу. Эсвэл давхар дээлтэй байх уу?  -ЗТХ-ийн сайдыг тэндээс эндээс томилно гэдэг асуудлыг яриагүй. ЗТХ-ийн сайдаар хэнийг томилох вэ гэдэг асуудал МАН-ын Удирдах зөвлөл дээр яригдана. -Таныг томилогдоно гэсэн яриа байсан?  -Би ЗТХ-ийн сайдаар ажиллахгүй. -Намрын чуулганаар Сонгуулийн тухай өөрчлөлтүүд орж ирсэн байна. Сонгуулийн хууль байнга ингэж өөрчлөгдөж байгаа нь хэр зөв вэ? -Сонгуулийн тогтолцооны хувьд Үндсэн хуульд захирагдаж байгаа. Үндсэн хуульд өөрчлөлт орууллаа гэхэд 2024 оноос хэрэгжиж эхлэхээр яригдаж байна. Сонгуулийн тогтолцооны хувьд тодорхой өөрчлөлт гарахгүй байх. -Үндсэн хуулийн өөрчлөлтөөр ард нийтийн санал асуулга явуулах уу?  -Үндсэн хуулийн өөрчлөлтийг хэлэлцэнэ гэдэгт бүлгийн гишүүд санал нэг байгаа. Санал асуулгыг хангалттай явуулсан. Давхардсан тоогоор сая гаруй хүнээс санал асуулга авсан байдаг. Үндсэн хуулийн өөрчлөлтөөр Ерөнхий сайдын, Засгийн газрын эрх мэдлийг нэмэгдүүлэх чиглэлд анхаарч ажиллана. Эх сурвалж:www.polit.mn