МСНЭ-ээс 1000 сэтгүүлчийг хямд өртөг бүхий чанартай орон сууцаар хангах хөтөлбөрийн нээлт өчигдөр боллоо.  Хөтөлбөрийн хүрээнд эхний ээлжинд 400 сэтгүүлч орон сууцтай болох юм.  Мөн сэтгүүлчдийн анхны 16 давхар ордны  барилгын шав тавих ёслол болов. Хотын дарга сэтгүүлчдэд амласан амлалтаа биелүүлж, шинийн 17-ны энэхүү билэгт сайн өдөр “Сэтгүүлч” ордон барих газрын гэрчилгээг МСНЭ-д олгосныг МСНЭ-ийн ерөнхийлөгч Х.Мандахбаяр салбарынхандаа танилцуулсан. Сүхбаатарын талбайгаас хоёр км-ийн зайд 32-ын тойрогт төв зам дагуу 678 ам.метр газрыг хотын захиргааны зүгээс сэтгүүлчдэд олгожээ. Ийнхүү газрын гэрчилгээтэй болсон МСНЭ-ийн удирдлагууд 16 давхар “Сэтгүүлч” ордны иж бүрэн зураг төсөл боловсруулах гэрээг “Марс Констракшн” компанитай байгуулснаар Сэтгүүлчдийн ордон босох ажил гараанаасаа хөдөллөө. Нийслэл хотыг хөгжүүлэх 2030 он хүртэлх ерөнхий төлөвлөгөө болон гэр хорооллын дахин төлөвлөлтийн дагуу Баянзүрх дүүргийн 5-р хорооны нутаг дэвсгэрт гэр хорооллыг орон сууцжуулах 1620 айлын  “Шинэ Гүрэн” иж бүрэн цогцолбор хорооллын бүтээн байгуулалтын төслийг “Шинэ Гарц” компани 2015 оноос өөрийн хөрөнгөөр амжилттай хэрэгжүүлж эхлээд байгаа юм. Тэгвэл “Шинэ Гүрэн” орон сууцны хорооллын бүтээн байгуулалтын төслийн хүрээнд эхний ээлжийн 400 сэтгүүлчийг орон сууцаар хангах гэрээнд мөн гарын үсэг зурж, шав тавих ёслол үйлдлээ. Ингэснээр 2019 онд эхний 100 сэтгүүлч нэг ам.метр нь 1.099.000 төгрөгийн үнэтэй бүрэн цутгамал орон сууцтай болох боломж бүрдэж байна. Хөтөлбөрт хамрагдах сэтгүүлч, хэвлэл мэдээллийн ажилтныг сонгон шалгаруулахдаа Сэтгүүлч, Редакци, МСНЭ-ийн хооронд гурвалсан гэрээ байгуулж сэтгүүлчийг редакцидаа тогтвор суурьшилтай ажиллах, сэтгүүлчдийнхээ нийгмийн асуудлыг шийдвэрлэх бодлогыг баримтлах ажээ. “Сэтгүүлзүйн салбар хараат бус хөгжихөд хамгийн жин дарсан ажил бол сэтгүүлчдийг орон сууцтай болгох асуудал. Тиймээс МСНЭ-ээс барилгын компаниудад санал болгож хоёр компани бидний саналыг хүлээн авч хамтарч ажилахаар болсонд баяртай байна” хэмээн МСНЭ-ийн ерөнхийлөгч Х.Мандахбаяр онцолсон. Орон сууцны нэг метр кв-ийн үнэ 2.300 мянган төгрөг бол сэтгүүлчдэд хямдруулж 1.099 мянган төгрөгөөр өгөхөөр болж байгаагаа “Шинэ Гарц” компанийн захирал Б.Бадамрагчаа хэлэв.

Эх сурвалж: “Зууны мэдээ” сонин